வேடசந்தூர் தேர்தல் 2026

Saminathan. T DMK

Won

தொகுதி அறிமுகம்

திண்டுக்கல் மாவட்டத்தில் அமைந்துள்ள வேடசந்தூர் தொகுதி, பெரும்பாலும் கிராமப்புறங்களைக் கொண்ட ஒரு தொகுதியாகும். இது திண்டுக்கல் மற்றும் கரூர் மாவட்டங்களை இணைக்கும் முக்கியப் பகுதியில் அமைந்துள்ளது. வானம் பார்த்த பூமியாக இருந்தாலும், இங்குள்ள மக்களின் கடின உழைப்பால் விவசாயம் மற்றும் சிறு தொழில்கள் ஆங்காங்கே செழித்து வருகின்றன.

பொருளாதாரம் & சிறப்புகள்

வேடசந்தூர் என்றாலே நினைவுக்கு வருவது புகையிலைதான். இங்கு விளையும் புகையிலை தரம் வாய்ந்தது. இதற்காகவே இங்கு மத்திய புகையிலை ஆராய்ச்சி நிலையம் (CTRI) அமைக்கப்பட்டுள்ளது. சுருட்டு மற்றும் மெல்லும் புகையிலை தயாரிப்பில் இத்தொகுதி முன்னணியில் உள்ளது. வேடசந்தூர் மற்றும் அதன் சுற்றுவட்டாரப் பகுதிகளில் ஏராளமான நூற்பாலைகள் உள்ளன. இது ஆயிரக்கணக்கான பெண்களுக்கு, குறிப்பாக கிராமப்புறப் பெண்களுக்குப் பெரும் வேலைவாய்ப்பை வழங்குகிறது. சமீபகாலமாக இப்பகுதி விவசாயிகள் முருங்கை சாகுபடியில் அதிக ஆர்வம் காட்டி வருகின்றனர். இங்கிருந்து முருங்கைக்காய் மற்றும் முருங்கை இலை பொடி கேரளா மற்றும் வெளிநாடுகளுக்கு ஏற்றுமதி செய்யப்படுகிறது. அய்யலூர் போன்ற பகுதிகளில் நடைபெறும் ஆட்டுச் சந்தை மற்றும் காய்கறிச் சந்தை இத்தொகுதியின் பொருளாதாரத்தில் முக்கியப் பங்கு வகிக்கிறது.

அரசியல் முக்கியத்துவம்

வேடசந்தூர் தொகுதி பெரும்பாலும் அண்ணா திராவிட முன்னேற்றக் கழகம் (ADMK) மற்றும் திராவிட முன்னேற்றக் கழகம் (DMK) ஆகிய இரு கட்சிகளுமே மாறி மாறி வெற்றி பெற்ற ஒரு சம பலம் கொண்ட தொகுதியாகும். கவுண்டர், முத்தரையர் மற்றும் தலித் சமூக மக்கள் இத்தொகுதியில் பெரும்பான்மையாக உள்ளனர். இவர்களுடன் ரெட்டியார் மற்றும் இதர சமூகத்தினரும் வெற்றியைத் தீர்மானிக்கும் சக்திகளாக உள்ளனர். வறட்சியான பகுதி என்பதால், காவிரி கூட்டுக் குடிநீர் திட்டத்தை அனைத்துக் கிராமங்களுக்கும் தங்குதடையின்றி கொண்டு சேர்ப்பது மக்களின் முதன்மையான கோரிக்கை. நங்காஞ்சியாறு மற்றும் குடகனாறு அணைகளைத் தூர்வாருதல் மற்றும் நீர் மேலாண்மைத் திட்டங்களைச் செயல்படுத்துவது விவசாயிகளின் நீண்டகால எதிர்பார்ப்பு.