ஸ்ரீவைகுண்டம் தேர்தல் 2026

Saravanan. G TVK

Won

தொகுதி அறிமுகம்

தாமிரபரணி ஆற்றின் மருதூர் அணையில் இருந்து பிரிந்து செல்லும் கால்வாய்கள் மூலம் பாசன வசதி பெறும் இத்தொகுதி, ஒரு பொதுத் தொகுதி ஆகும். இத்தொகுதி ஸ்ரீவைகுண்டம் பேரூராட்சி மற்றும் அதனைச் சுற்றியுள்ள கருங்குளம், ஆழ்வார்திருநகரி போன்ற ஒன்றியப் பகுதிகளை உள்ளடக்கியது. இது தூத்துக்குடி மக்களவைத் தொகுதியின் கீழ் வருகிறது.

பொருளாதாரம் & சிறப்புகள்

தாமிரபரணி ஆற்றின் நீர் பாசனத்தால் இத்தொகுதி எப்போதும் பசுமையாகக் காணப்படும். இங்கு வாழை சாகுபடி மிக அதிகம். ஸ்ரீவைகுண்டம் மற்றும் அதனைச் சுற்றியுள்ள பகுதிகளில் இருந்து கேரளா மற்றும் வட மாநிலங்களுக்கு வாழைக்காய்கள் மற்றும் இலைகள் பெருமளவில் ஏற்றுமதி செய்யப்படுகின்றன. 108 வைணவத் திருத்தலங்களில் ஒன்றான ஸ்ரீவைகுண்டம் கள்ளபிரான் சுவாமி கோயில் இத்தொகுதியின் அடையாளம். இது நவதிருப்பதி தலங்களில் முதலாவதாகும். மேலும், ஆழ்வார்திருநகரி ஆதிநாதர் ஆழ்வார் கோயில் (நம்மாழ்வார் அவதரித்த தலம்) இத்தொகுதியில்தான் உள்ளது. தாமிரபரணி ஆற்றின் குறுக்கே அமைந்துள்ள இந்த அணை, இத்தொகுதியின் விவசாயத்திற்கு உயிர்நாடியாகத் திகழ்கிறது. உலகப்புகழ் பெற்ற ஆதிச்சநல்லூர் தொல்பொருள் அகழ்வாராய்ச்சி தளம் இத்தொகுதிக்கு உட்பட்ட பகுதியில் அமைந்துள்ளது. இங்கு கண்டெடுக்கப்பட்ட பொருட்கள் தமிழர்களின் பழைமையான நாகரிகத்திற்குச் சான்றாக விளங்குகின்றன. தற்போது இங்கு உலகத்தரம் வாய்ந்த ஆன்சைட் அருங்காட்சியகம் (On-site Museum) அமைக்கப்பட்டு வருகிறது.

அரசியல் மற்றும் சமூகச் சூழல்

ஸ்ரீவைகுண்டம் தொகுதி நீண்டகாலமாக விவசாயிகளின் நலன் மற்றும் சமூக நீதியை அடிப்படையாகக் கொண்ட அரசியல் களமாக இருந்து வருகிறது. நாடார், தலித் (தேவேந்திர குல வேளாளர்), முக்குலத்தோர் மற்றும் பிள்ளை (வெள்ளாளர்) சமூக மக்கள் இத்தொகுதியில் பரவலாக வசிக்கின்றனர். ஒவ்வொரு தேர்தலிலும் சாதி ரீதியான வாக்கு வங்கிகள் இங்கு முக்கியப் பங்கு வகிக்கின்றன. இப்பகுதியில் வாழை சாகுபடி அதிகம் என்பதால், அவற்றைப் பதப்படுத்தவும், மதிப்புக்கூட்டப்பட்ட பொருட்களாக (சிப்ஸ், மாவு) மாற்றவும் அரசு சார்பில் தொழிற்சாலை மற்றும் குளிர்பதனக் கிடங்கு அமைக்கப்பட வேண்டும் என்பது விவசாயிகளின் நீண்டகாலக் கோரிக்கை.