கோவையில் பூத் கமிட்டி மாநாடு.. தேதி குறித்த விஜய்.. ஏற்பாடுகள் தீவிரம்!
Tamilaga Vettri Kazhagam Vijay : தமிழக வெற்றிக் கழகத்தில் பூத் கமிட்டி மாநாடு கோவை மாவட்டத்தில் 2025 ஏப்ரல் 26,27ஆம் தேதிகளில் நடைபெறும் என்று தகவல் வெளியகி உள்ளது. கட்சி தொடங்கியதில் இருந்தே வட மாவட்டங்களை குறிவைத்து நிகழ்ச்சிகளை அரங்கேற்றி வந்த விஜய், தற்போது , அவரது பார்வை கொங்கு மண்டலம் பக்கம் திரும்பியுள்ளது.
சென்னை, ஏப்ரல் 18: தமிழக வெற்றிக் கழகத்தின் (Tamilaga Vettri Kazhagam) பூத் கமிட்டி (TVK Booth Committee) மாநாடு கோயம்புத்தூர் மாவட்டத்தில் 2025 ஏப்ரல் 26,27ஆம் தேதிகளில் நடைபெறும் என்று தகவல் வெளியாகி உள்ளது. இதற்கான ஏற்பாடுகளை அக்கட்சியினர் தீவிரமாக செய்து வருகின்றனர். 5 மண்டலங்களில் பூத் கமிட்டி மாநாட்டை நடத்த தமிழக வெற்றிக் கழகம் திட்டமிட்டிருக்கிறது. அதில், முதற்கட்டமாக கோவையில் பூத் கமிட்டி மாநாடு 2025 ஏப்ரல் 26,27ஆம் தேதிகளில் நடைபெறும் என்று கூறப்படுகிறது.
கோவையில் பூத் கமிட்டி மாநாடு
கடந்த 2024ஆம் ஆண்டு தமிழக வெற்றிக் கழகம் எனும் கட்சியை தொடங்கிய விஜய், பல்வேறு அதிரடி நடவடிக்கைகளை எடுத்து வருகிறார். குறிப்பாக, கட்சியை பலப்படுத்த தீவிரமாக விஜய் செயல்பட்டு வருகிறார். கட்சி தொடங்கிய வேகத்திலேயே விக்கிரவாண்டியில் முதல் மாநாட்டை பிரம்மாண்டமாக நடத்தினார்.
அதன்பிறகு, கட்சி ரீதியாக மாவட்டங்களாக பிரித்து, அதற்கு மாவட்ட செயலளார்கள், பொறுப்பாளர்கள் என ஒரு மாவட்டத்திற்கு 3 பேரை நியமித்தார். அண்மையில், தமிழக வெற்றிக் கழகத்தில் செயற்குழு கூட்டத்தை நடத்தி முடித்த கையோடு, கட்சியின் இரண்டாம் ஆண்டு தொடக்க விழாவையும் நடத்தினார்.
அடுத்ததாக, தற்போது பூத் கமிட்டி மாநாட்டை நடத்த விஜய் திட்டமிட்டு இருக்கிறார். தமிழகத்தில் 60 ஆண்டுகளுக்கு மேலாக ஆட்சியில் இருக்கும் திராவிட கட்சிககளின் வெற்றிக் காரணமே பூத் கமிட்டி தான். அதில் தான் தற்போது விஜய் கவனம் செலுத்தி வருகிறார்.
5 மண்டலமாக பூத் கமிட்டி மாநாட்டை விஜய் நடத்த திட்டமிட்டுள்ளார். அதாவது, வடக்கு, மேற்கு, தெற்கு? மத்திய மண்டலத்தில் பூத் கமிட்டி மாநாட்டை நடத்த திட்டமிடப்பட்டுள்ளது. அதில் முதற்கட்டமாக கோவை மாவட்டத்தில் பூத் கமிட்டி மாநாடு நடைபெற உள்ளது.
தேதி குறித்த விஜய்
கோயம்புத்தூர் மாவட்டத்தில் 2025 ஏப்ரல் 26,27ஆம் தேதிகளில் பூத் கமிட்டி மாநாடு நடைபெறும் என்று தகவல் வெளியாகி உள்ளது. கோவை சரவணம்பட்டியில் உள்ள தனியார் கல்லூரி வளாகத்தில் நடைபெற உள்ளதாக கூறப்படுகிறது. இதற்கான ஏற்பாடுகளை தமிழக வெற்றிக் கழக நிர்வாகிகள் செய்து வருகின்றனர்.
இந்த மாநாட்டில் கட்சி நிர்வாகிகளுக்கு மட்டுமே அனுமதி வழங்கப்படும். பொதுமக்களுக்கு அனுமதி கிடையாது. கொங்கு மண்டலத்தில் அதிமுக உள்ளிட்ட கட்சிகள் மட்டுமே ஆதிக்கம் செலுத்தி வரும் இடத்தில், விஜய் தனது முதல் பூத் கமிட்டி மாநாட்டை நடத்துவது பெரிதும் அவருக்கு கைகொடுக்கும் என எதிர்பார்க்கப்படுகிறது.
தமிழகத்தில் 2026 சட்டப்பேரவை தேர்தலுக்கு சரியாக ஓராண்டு இருக்கிறது. இதனால், அரசியல் அரசியல் கட்சிகள் பலரும் தேர்தல் வேலைகளில் தீவிரமாக இறங்கியுள்ளனர். மீண்டும் ஆட்சியை தக்க வைக்க திமுக முனைப்பு காட்டி வரும் நிலையில், திமுகவை வீழ்த்து ஆட்சி கட்டிலில் அமர அதிமுக வியூகம் அமைத்து வருகிறது. அதே நேரத்தில், தமிழக வெற்றிக் கழகமும் இந்த ரேஸில் தீவிரமாக உள்ளது.
