Tamil News Videos, Latest Tamil Videos, Tamil Entertainment Videos, Kollywood Videos, Political News Videos, Tamil Viral Videos

அதிகரிக்கும் டெங்கு பாதிப்பு.. தூத்துக்குடி அரசு மருத்துவமனையில் சிறப்பு ஏற்பாடுகள்..

Aarthi Govindaraman — Fri, 25 Sep 2026 08:07:15 +0530

தூத்துக்குடி அரசு மருத்துவக் கல்லூரி மருத்துவமனையில் டெங்கு காய்ச்சல் சிகிச்சைக்காக பெரியவர்களுக்கு 60 படுக்கைகள், குழந்தைகளுக்கு 40 படுக்கைகள் என தனி வார்டுகள் தயார் நிலையில் உள்ளதாக மருத்துவமனை கண்காணிப்பாளர் டாக்டர் ஆர். பத்மநாபன் தெரிவித்துள்ளார். டெங்கு நோயாளிகளுக்கு தேவையான ஐ.வி. திரவங்கள், மருந்துகள், ரத்தம் மற்றும் பிளாஸ்மா உள்ளிட்டவை போதுமான அளவில் இருப்பதாகவும் அவர் கூறினார். அதிக காய்ச்சல், தலைவலி, உடல்வலி ஏற்பட்டால் சுயமாக மருந்து எடுத்துக்கொள்ளாமல் உடனடியாக மருத்துவரை அணுக வேண்டும் என்றும், குறிப்பாக NSAID வகை வலி நிவாரணிகளைத் தவிர்க்க வேண்டும் என்றும் அறிவுறுத்தினார். டெங்கு நோயின் முக்கியமான கட்டத்தில் கடுமையான வயிற்றுவலி, வாந்தி, உடல் சோர்வு மற்றும் ரத்தத்தில் தட்டணுக்களின் எண்ணிக்கை குறைதல் போன்ற அறிகுறிகள் ஏற்படலாம் என தெரிவித்தார். மேலும், ஏடிஸ் கொசுக்கள் தேங்கியுள்ள சுத்தமான நீரில் உற்பத்தியாகும் என்பதால், வீட்டைச் சுற்றிலும் தண்ணீர் தேங்காமல் பார்த்துக்கொள்ள வேண்டும் என்றும் அறிவுறுத்தினார். தற்போது மருத்துவமனையில் ஓரிரு டெங்கு நோயாளிகள் மட்டுமே சிகிச்சை பெற்று வருவதாகவும், பொதுமக்கள் அச்சப்பட வேண்டாம் என்றும் அவர் கேட்டுக்கொண்டார்.

கோழிக்கூண்டை திருட முடியாமல் 2 கோழிகளுடன் தப்பிய வாலிபர்கள்.. வெளியான சிசிடிவி காட்சிகள்..

Aarthi Govindaraman — Thu, 24 Sep 2026 07:11:09 +0530

கோவையில் கோழிக்கூண்டை திருட முயன்று முடியாததால், 2 பிராய்லர் கோழிகளை மட்டும் திருடிச் சென்ற வாலிபர்களின் சி.சி.டி.வி. காட்சிகள் சமூக வலைதளங்களில் வைரலாகி வருகின்றன. கோவை ராமநாதபுரம் பகுதியில் நள்ளிரவில் இருசக்கர வாகனத்தில் வந்த இரு வாலிபர்கள், பிராய்லர் கோழிக்கடையின் முன் வைக்கப்பட்டிருந்த பெரிய இரும்புக் கூண்டை தூக்கிச் செல்ல முயன்றுள்ளனர். கூண்டு அதிக எடையுடன் இருந்ததால் அதைத் தூக்க முடியாமல் கைவிட்டனர். இதையடுத்து அருகில் இருந்த மற்றொரு கோழிக்கடைக்குச் சென்ற அவர்கள், கூண்டுக்குள் இருந்த 2 கோழிகளை மட்டும் திருடி இருசக்கர வாகனத்தில் வைத்துக்கொண்டு தப்பிச் சென்றனர். கடை உரிமையாளர்கள் சி.சி.டி.வி. காட்சிகளை ஆய்வு செய்தபோது இந்த சம்பவம் தெரியவந்தது.

பூம்புகார் விற்பனை நிலையத்தில் நவராத்திரி கொலு பொம்மை கண்காட்சி தொடக்கம்

Sathis S — Wed, 23 Sep 2026 20:41:48 +0530

சேலம் திருவள்ளுவர் சிலை அருகே உள்ள பூம்புகார் விற்பனை நிலையத்தில் நவராத்திரி மற்றும் விஜயதசமி பண்டிகையை முன்னிட்டு கொலு பொம்மை சிறப்பு கண்காட்சி மற்றும் விற்பனை இன்று தொடங்கியது. இதனை சேலம் மாவட்ட வருவாய் அலுவலர் ரவிக்குமார் ரிப்பன் வெட்டி தொடங்கி வைத்தார். இந்தக் கண்காட்சி அடுத்த மாதம் 31-ஆம் தேதி வரை நடைபெற உள்ளது. கண்காட்சியில் 18 சித்தர்கள் செட், கிரிவலம், சோளிங்கர், திருநாவுக்கரசர், பஞ்சஸ்தலம், மகாபாரதம் உள்ளிட்ட பல்வேறு வகையான கொலு பொம்மைகள் இடம்பெற்றுள்ளன. மேலும், அப்துல் கலாம், திருவள்ளுவர், விவேகானந்தர் மற்றும் முதல்வர் விஜய் உருவம் பதித்த பொம்மைகளும் புதிய வரவாக விற்பனைக்கு வைக்கப்பட்டுள்ளன. ராம்செட், குபேரன் செட், கும்பகோணம் செட், ஆழ்வார் செட், பழக்கடை, காய்கறி கடை உள்ளிட்ட 1,000-க்கும் மேற்பட்ட வகையான பொம்மைகள் இடம்பெற்றுள்ளன. ரூ.15 முதல் ரூ.32,500 வரை விலை நிர்ணயிக்கப்பட்டுள்ளது. அனைத்து பொருட்களுக்கும் 10 சதவீத சிறப்பு தள்ளுபடி வழங்கப்படுவதாக மேலாளர் நரேந்திரபோஸ் தெரிவித்துள்ளார்.

துறையூர் மோட்டார் வாகன அலுவலக ஊழியர் லஞ்சம் வாங்கியதாக வீடியோ வைரல்

Aarthi Govindaraman — Wed, 23 Sep 2026 20:32:54 +0530

திருச்சி மாவட்டம் துறையூரில் செயல்பட்டு வரும் மோட்டார் வாகன ஆய்வாளர் அலுவலகத்தில் பணிபுரியும் ஊழியர் ஒருவர் லஞ்சம் பெறுவது போன்ற வீடியோ சமூக வலைதளங்களில் வைரலாகி வருகிறது. நாமக்கல் மாவட்டம் வாலசிராமணியைச் சேர்ந்த விஜி என்பவர், கடந்த இரண்டு ஆண்டுகளாக துறையூர் மோட்டார் வாகன ஆய்வாளர் அலுவலகத்தில் கிளர்க்காக பணியாற்றி வருவதாக கூறப்படுகிறது. மோட்டார் வாகன ஓட்டுநர் பயிற்சி பள்ளி நிர்வாகிகளின் விண்ணப்பங்களை விரைந்து பரிசீலித்து வழங்குவதற்காக, அவர்களிடம் பணம் பெறுவது போன்ற காட்சிகள் வீடியோவில் இடம்பெற்றுள்ளதாக கூறப்படுகிறது. இந்த வீடியோ தற்போது சமூக வலைதளங்களில் வேகமாக பரவி வருகிறது. இதுகுறித்து உரிய விசாரணை நடத்தி, சம்பந்தப்பட்ட ஊழியர் மீது நடவடிக்கை எடுக்க வேண்டும் என ஓட்டுநர் உரிமம் பெற வரும் பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.

“ராதாவுக்கு ரூ.5,000 கோடிக்கு சொத்து இருக்கும்”.. பரபரப்பை கிளப்பிய நடிகை அம்பிகா!!

Esakkiraja Selvarathinam — Wed, 23 Sep 2026 14:54:40 +0530

சென்னை, செப்.23: தமிழ் திரையுலகில் 1980-களில் முன்னணி நடிகைகளாக வலம் வந்த சகோதரிகள் அம்பிகா மற்றும் ராதா இடையே நிலவி வரும் சொத்துப் பிரச்சனை தற்போது காவல்நிலையம் மற்றும் செய்தியாளர் சந்திப்பு வரை சென்று பெரும் பரபரப்பை ஏற்படுத்தியுள்ளது. நடிகை ராதா, தனது கையெழுத்திடப்பட்ட காசோலைகளைப் பயன்படுத்தி சுமார் ரூ.46 கோடி மோசடி செய்ய முயன்றதாக தனது சகோதரி அம்பிகா மற்றும் சகோதரர் மீது சென்னை காவல் ஆணையர் அலுவலகத்தில் புகார் அளித்திருந்தார். இந்தச் சூழலில், தன் மீது சுமத்தப்பட்ட காசோலை மோசடி குற்றச்சாட்டுகளுக்கு மறுப்பு தெரிவித்தும், குடும்பச் சொத்துப் பிரிவினையின் பின்னணியை விளக்கியும் நடிகை அம்பிகா செய்தியாளர்களைச் சந்தித்துத் தன் தரப்பு விளக்கத்தை அளித்துள்ளார்.

காசோலை நிறுத்தம் மற்றும் ரூ.97 கோடி நிலுவை:

செய்தியாளர் சந்திப்பில் பேசிய நடிகை அம்பிகா, காசோலை மோசடி விவகாரத்தில் உண்மையாகப் பாதிக்கப்பட்டவர் தான் தான் என்று தெரிவித்தார். "எனக்குக் காசோலைகளை வழங்கியதே நடிகை ராதா தான்; ஆனால் அவற்றை வங்கியில் செலுத்திய போது பணப் பரிவர்த்தனையை நிறுத்தி வைத்ததும் அவரே தான். சொத்துகளைப் பிரித்த வகையில் ராதா தரப்பில் இருந்து எனக்கு ரூ.97 கோடி வர வேண்டும், அதற்காகவே எனக்கு 5 காசோலைகள் வழங்கப்பட்டன. ராதா கையெழுத்திட்டுக்கொடுத்த காசோலை அவரது வீட்டில் தான் இருந்தது; அவரது வீட்டில் உள்ள காசோலையை நான் எப்படித் திருட முடியும்? காசோலையைக் கொடுத்ததும் ராதா தான், அதை நிறுத்தியதும் ராதா தான், இறுதியில் பணம் வராமல் பாதிக்கப்பட்டதும் நான் தான்" என்று அவர் அடுக்கடுக்கான கேள்விகளை எழுப்பினார்.

ஜெம் வீரமணி வழக்கு.. திமுகவை நோக்கி சரமாரி கேள்விகளை எழுப்பிய அமைச்சர் ராஜ்மோகன்!

Esakkiraja Selvarathinam — Wed, 23 Sep 2026 14:40:18 +0530

சென்னை, செப்.23: தமிழக அரசியலில் பெரும் பரபரப்பை ஏற்படுத்தியுள்ள 'ஜெம் வீரமணி' மீதான பாலியல் வழக்கு தொடர்பாக, தவெகவைச் சேர்ந்த அமைச்சர் ராஜ்மோகன் சென்னை எழும்பூரில் செய்தியாளர்களைச் சந்தித்துப் பேட்டியளித்தார். அப்போது, இந்த விவகாரத்தில் முந்தைய திமுக ஆட்சிக் காலத்தில் நடந்த சம்பவங்கள் குறித்தும், வழக்கு விசாரணையை மந்தப்படுத்தியது யார் என்பது குறித்தும் அவர் அடுக்கடுக்கான கேள்விகளை முன்வைத்தார். மேலும், பாதிக்கப்பட்ட குழந்தைகள் மற்றும் பெண்களுக்கான உரிமைகளை மீட்டெடுப்பதில் அரசு உறுதியாக உள்ளது என்றும், இந்த வழக்கு முதலமைச்சரின் நேரடி கண்காணிப்பில் தீவிரமாக நடைபெற்று வருகிறது என்றும் அவர் உறுதிபடத் தெரிவித்தார்.

வீடியோ ஆதாரம் மற்றும் ரகுபதிக்குக் கண்டனம்:

செய்தியாளர் சந்திப்பின் போது பேசிய அமைச்சர் ராஜ்மோகன், முன்னாள் திமுக அமைச்சர் ரகுபதியின் அண்மைய பேச்சைச் சுட்டிக்காட்டி கடும் கண்டனம் தெரிவித்தார். "வீடியோ கிளாரிட்டி மற்றும் ஹெச்டி தரம் குறித்துப் பேசுவதற்கு முன்பாகக் கொஞ்சம் மனசாட்சியும் மனிதாபிமானமும் இருக்க வேண்டும்" என்று சாடிய அவர், அந்த வீடியோவின் தரம் எப்படி இருந்தாலும், அதில் உள்ள குற்றச்சாட்டின் தீவிரத்தன்மையை உணர்ந்து பேச வேண்டும் என வலியுறுத்தினார். மேலும், இந்த வழக்கின் பின்னணியில் உள்ள அதிர்ச்சி தரும் தகவல்கள் வெளியாகி வருவதாகவும், பாதிக்கப்பட்ட சிறு குழந்தைகள் முன்வந்து புகார் அளிக்கும் சூழலில், பொறுப்பைத் தட்டிக்கழிக்கும் வகையில் திமுகவினர் பேசி வருவதாகவும் குற்றம் சாட்டினார்.

“செப்டிக் டேங்கில் விழுந்த காட்டெருமை”.. வால்பாறையில் 4 மணி நேரம் போராடி மீட்ட வனத்துறை!

Sekaran S — Wed, 23 Sep 2026 13:20:07 +0530

கோவை, செப்.23: கோவை மாவட்டம் வால்பாறை மற்றும் அதனைச் சுற்றியுள்ள மலைப் பகுதிகளில் அடர்ந்த வனப்பகுதியை ஒட்டி ஏராளமான தேயிலைத் தோட்டங்கள் அமைந்துள்ளன. வனவிலங்குகளின் இயற்கையான வாழ்விடங்களை ஒட்டியே மனிதக் குடியிருப்புகளும் தொழிலாளர்களின் லயன் படிகளும் அமைந்துள்ளதால், இங்கு யானைகள், சிறுத்தைகள் மற்றும் காட்டெருமைகளின் நடமாட்டம் இயல்பாகவே அதிகரித்து வருகிறது. குறிப்பாக, இரவு நேரங்களில் உணவு மற்றும் தண்ணீரைத் தேடித் தோட்டப் பகுதிகளுக்குள் நுழையும் காட்டெருமைகள், சில நேரங்களில் மனிதர்கள் அமைத்துள்ள ஆழமான குழிகள் மற்றும் பயன்பாட்டில் உள்ள தொட்டிகளில் விழுந்து விபத்தில் சிக்குவது தொடர்கதையாகி வருகிறது. அந்த வகையில், அக்காமலை எஸ்டேட் பகுதியில் நள்ளிரவில் கழிவுநீர்த் தொட்டிக்குள் தவறி விழுந்த காட்டெருமை ஒன்றை வனத்துறையினர் துரிதமாகச் செயல்பட்டு பத்திரமாக மீட்டுள்ளனர்.

நள்ளிரவில் நடந்த எதிர்பாராத விபத்து:

வால்பாறை அருகே அமைந்துள்ள அக்காமலை எஸ்டேட் 2-வது டிவிஷன் 'ஐந்துலயன் பாடி' பகுதியில், எஸ்டேட் தொழிலாளியான ஜோதி என்பவரின் வீட்டருகே நள்ளிரவு சுமார் 1 மணி அளவில் சுமார் 5 வயது மதிக்கத்தக்கப் பெண் காட்டெருமை ஒன்று உலா வந்துள்ளது. அப்போது எதிர்பாராத விதமாக, அங்கு அமைக்கப்பட்டிருந்த கழிவுநீர்த் தொட்டியின் (செப்டிக் டேங்க்) மீது அந்த காட்டெருமை ஏறியுள்ளது. எதிர்பாராதவிதமாகத் தொட்டியின் மேல்மூடி உடைந்ததில், காட்டெருமை தொட்டிக்குள் தவறி விழுந்து மேலே வர முடியாமல் தத்தளித்தது. காட்டெருமையின் அலறல் சத்தத்தைக் கேட்டு வீட்டை விட்டு வெளியே வந்து பார்த்த அப்பகுதி மக்கள், உடனடியாக வால்பாறை வனச்சரக அலுவலருக்கும் எஸ்டேட் நிர்வாகத்திற்கும் தகவல் தெரிவித்தனர்.

சேலம் ராஜகணபதி கோவிலில் தேரோட்ட வைபவம்.. ஏராளமான பக்தர்கள் பங்கேற்பு!

Sathis S — Tue, 22 Sep 2026 20:55:58 +0530

சேலம் சுகவனேஸ்வரர் கோயிலின் உபகோவிலான ராஜகணபதி கோயில் சின்ன கடைவீதி பகுதியில் அமைந்துள்ளது மிகவும் பழமை வாய்ந்ததும் பிரசித்தி பெற்ற ஸ்ரீ ராஜகணபதி திருக்கோவிலில் ஆண்டு தோறும் விநாயகர் சதுர்த்தி முன்னிட்டு 12 நாட்கள் பிரம்மோற்சவ வைபவம் நடைபெறுவது வழக்கம். இந்த ஆண்டு ஆகஸ்ட் 30ஆம் தேதி 12 ஆண்டுகளுக்குப் பிறகு ஸ்ரீ ராஜகணபதி கோவிலுக்கு கும்பாபிஷேக வைப்பகம் நடைபெற்றது. அதனை தொடர்ந்து விநாயகர் சதுர்த்தி பிரம்மோற்சவம் நிகழ்ச்சி தொடங்கி நாள்தோறும் பல்வேறு சிறப்பு பூஜைகள் வைப்பவங்கள் நடைபெற்று கொண்டு வருகின்றன. மாலையில் ஒவ்வொரு நாளும் விநாயகர் பெருமான் பல்வேறு அலங்காரத்தில் காட்சியளிப்பார். இந்த நிலையில் விநாயகர் சதுர்த்தியை முன்னிட்டு பிரம்மோற்சவ நிகழ்ச்சியாக ஒன்பதாம் நாளான இன்று தேரோட்ட வைபவம் நடைபெற்றது. முன்னதாக ராஜகணபதி மூலவர் மற்றும் உற்சவ மூர்த்திக்கு பால் இளநீர் பஞ்சாமிர்தம் உள்ளிட்ட பல்வேறு வாசனை திரவியங்களால் சிறப்பு அபிஷேகங்கள் செய்யப்பட்டன. தொடர்ந்து பட்டாடைகள் உடுத்தப்பட்டு பல்வேறு வாசனை மலர்களால் மூலவர் ராஜகணபதிக்கு ராஜா அலங்காரம் செய்யப்பட்டன பின்னர் உற்சவமூர்த்தியான விநாயகப் பெருமானுக்கு சிறப்பு அலங்காரம் செய்யப்பட்டு பட்டாடை உடுத்தி வண்ண மலர்களை கொண்டு சிறப்பு அலங்காரம் செய்யப்பட்டு முதன் முறையாக தேரோட்ட நிகழ்ச்சியில் அலங்கரிக்கப்பட்ட தேரில் உற்சவ விநாயகப் பெருமான் எழுந்தருள செய்தனர்.

திருச்சியில் 590 பள்ளிகளில் காமராஜர் காலை உணவுத் திட்டம் விரிவாக்கம்.. அமைச்சர் ரமேஷ் விளக்கம்!

Deepan — Tue, 22 Sep 2026 20:48:00 +0530

திருச்சியில் அமைச்சர் ரமேஷ் செய்தியாளர்களை சந்தித்தார், அப்போது பேசிய அவர் தமிழ்நாட்டில் பள்ளி மாணவர்களின் ஊட்டச்சத்து நிலையை மேம்படுத்தவும், பசியின்றி மாணவ, மாணவியர்கள் பள்ளிக்கு வருவதை உறுதி செய்து, கல்வியில் முழுமையான கவனம் செலுத்தும் வகையிலும் காமராஜர் காலை உணவுத் திட்டம் செயல்படுத்தப்பட்டு வருகிறது. முதலமைச்சர் ஜோசப் விஜய் தலைமையில் கடந்த ஜூன் 15-ஆம் தேதி நடைபெற்ற சமூக நலன் மற்றும் மகளிர் உரிமைத்துறையின் செயல்பாடுகள் குறித்த ஆய்வுக் கூட்டத்தில், காலை உணவுத் திட்டத்தை 6 முதல் 8-ஆம் வகுப்பு வரை பயிலும் மாணவ, மாணவியர்களுக்கும் விரிவுபடுத்த உரிய நடவடிக்கைகளை மேற்கொள்ளுமாறு துறை அலுவலர்களுக்கு உத்தரவிடப்பட்டது. அதன் அடிப்படையில், தமிழகம் முழுவதும் இன்று இத்திட்டம் விரிவுபடுத்தப்பட்டது. சென்னை திருவொற்றியூரில் உள்ள நடுநிலைப் பள்ளியில் நடைபெற்ற நிகழ்ச்சியில் தமிழக முதல்வர் ஜோசப் விஜய் கலந்து கொண்டு, காமராஜர் காலை உணவுத் திட்டத்தின் விரிவாக்கத்தை தொடங்கி வைத்தார். இதனைத் தொடர்ந்து, மாவட்டத்தின் பல்வேறு பகுதிகளில் உள்ள அரசு பள்ளிகளிலும் திட்டம் விரிவுபடுத்தப்பட்டது. திருச்சி மாவட்டத்தில் ஊராட்சிப் பகுதிகளில் 415 பள்ளிகளில் சுமார் 36,800 மாணவர்கள் பயன்பெறும் வகையில் காலை உணவுத் திட்டம் விரிவுபடுத்தப்பட்டுள்ளது. பேரூராட்சிப் பகுதிகளில் 33 பள்ளிகளில் 5,845 மாணவர்களும், நகராட்சிப் பகுதிகளில் 27 பள்ளிகளில் 5,567 மாணவர்களும் பயன்பெறும் வகையில் திட்டம் செயல்படுத்தப்படுகிறது என்று கூறினார்.

மூதாட்டி வீட்டில் உணவு அருந்தி குறைகளை கேட்ட அமைச்சர் என். ஆனந்த்

Sathis S — Tue, 22 Sep 2026 18:19:06 +0530

மதுராந்தகம் சட்டமன்றத் தொகுதி இடைத்தேர்தலில் தமிழக வெற்றிக் கழகம் சார்பில் போட்டியிடும் மரகதம் குமரவேலுக்கு ஆதரவாக, அக்கட்சியின் பொதுச்செயலாளர் மற்றும் நீர்வளத்துறை அமைச்சர் என். ஆனந்த் தீவிர பிரசாரத்தில் ஈடுபட்டு வருகிறார். இதன் ஒரு பகுதியாக, அச்சரப்பாக்கம் ஒன்றியத்துக்குட்பட்ட பாதிரி கிராமத்தில் வீடு வீடாகச் சென்று பொதுமக்களிடம் வாக்கு சேகரித்தார். அப்போது, அப்பகுதியில் வசிக்கும் மூதாட்டி ஒருவரின் வீட்டிற்குச் சென்ற அவர், அவருடன் அமர்ந்து உணவு மற்றும் தண்ணீர் அருந்தினார். தொடர்ந்து, மூதாட்டியிடம் குடும்ப நிலை, அப்பகுதி மக்களின் தேவைகள் மற்றும் அடிப்படை வசதிகள் குறித்து கேட்டறிந்தார். அமைச்சர் இயல்பாக அமர்ந்து உணவு அருந்தி, குறைகளை கேட்டறிந்தது அப்பகுதி மக்களிடையே நெகிழ்ச்சியை ஏற்படுத்தியது. பின்னர், கிராமத்தின் பல்வேறு பகுதிகளில் வாக்கு சேகரித்து, மரகதம் குமரவேலுக்கு ஆதரவாக பிரசாரம் மேற்கொண்டார்.

பட்டாசு உற்பத்தியில் ‘Zero Accident’ இலக்கு.. கோவையில் மாபெரும் கலந்தாய்வு!

Sekaran S — Mon, 21 Sep 2026 23:49:32 +0530

தமிழ்நாட்டின் மிக முக்கியத் தொழில் துறையான பட்டாசு உற்பத்தியில் விபத்துகளை முற்றிலுமாகத் தடுத்து, தொழிலாளர் பாதுகாப்பை உறுதி செய்யும் நோக்கில் "பாதுகாப்பான பட்டாசு உற்பத்திக்கான தொழில்நுட்பம் – Zero Accident Vision நோக்கி" என்ற தலைப்பில் தேசிய அளவிலான மாபெரும் கலந்தாய்வு கோவையில் நடைபெற உள்ளது. இந்தியாவின் மொத்த பட்டாசு உற்பத்தியில் சுமார் 90% பங்களிப்பை வழங்கி வரும் தமிழ்நாட்டின் பட்டாசுத் தொழில், ஆண்டுக்கு ரூ.6,000 கோடி வர்த்தகத்தையும், 7 லட்சத்திற்கும் மேற்பட்டோருக்கு நேரடி மற்றும் மறைமுக வேலைவாய்ப்பையும் வழங்கி வருகிறது. இத்தகைய பிரம்மாண்ட தொழில்துறையில் தொழிலாளர் பாதுகாப்பு, தானியங்கி இயந்திரமயமாக்கல், தீ தடுப்பு மற்றும் அவசரகாலத் தயார்நிலை ஆகியவை இனி தனித்தனி பிரச்சனைகளாகப் பார்க்கப்படாமல், ஒருங்கிணைக்கப்பட்ட தொழில்முறை முன்னுரிமையாக அணுகப்பட வேண்டும் என்ற அடிப்படையில் இந்தக் கலந்தாய்வு ஏற்பாடு செய்யப்பட்டு உள்ளது. தமிழ்நாடு பட்டாசு மற்றும் அமோர்சஸ் உற்பத்தியாளர்கள் சங்கம் மற்றும் தென்னிந்திய பாதுகாப்பு உதிரிபாகங்கள் தயாரிப்பாளர்கள் மற்றும் ஸ்டார்ட்அப் சங்கம் ஆகியவை இணைந்து நடத்தும் இந்தத் தேசிய கலந்தாய்வு, வரும் செப்டம்பர் 25 மற்றும் 26 ஆகிய தேதிகளில் கோவை ஈச்சனாரியில் உள்ள 'ரத்தினம் கிராண்ட் ஹாலில்' நடைபெறவுள்ள SIDA Defence Expo 2026-ன் முக்கிய அங்கமாக நடைபெறுகிறது.

ஆதவ் அர்ஜுனாவுக்கு அனுபவம் குறைச்சல்.. பொள்ளாச்சி ஜெயராமன் பேச்சு!

Vinalin Sweety — Mon, 21 Sep 2026 22:50:06 +0530

கோயம்புத்தூர் விமான நிலையத்தில் அதிமுக முன்னாள் துணை சபாநாயகர் பொள்ளாச்சி ஜெயராமன் செய்தியாளர்களை சந்தித்தார். அப்போது பேசிய அவர், அதிமுகவினர் மீது பொய் வழக்கு போட்டு ஆளும் கட்சியினர் மிரட்ட பார்க்கின்றனர். இந்த மிரட்டலுக்கு நாங்கள் அஞ்ச மாட்டோம். இது பனங்காட்டு நரி. சலசலப்புக்கு அஞ்சாது. இது போன்ற பொய் வழக்குகளை சந்தித்துதான் 50 ஆண்டுகளுக்கு மேலாக இந்த இயக்கத்தில் இருக்கிறோம். அதிமுகவின் வெற்றியை தடுக்க இவர்கள் செய்யும் முயற்சி அனைத்தும் பொய்த்துப்போகும் என்று அவர் கூறியுள்ளார். அமைச்சர் ஆதவ் அர்ஜுனாவுக்கு ஒன்றும் புரியவில்லை. அனுபவம் குறைச்சல். பல கட்சி மாறி வந்தவர். இப்போது மந்திரி ஆகிவிட்டதால் அவருக்கு என்ன பேசுவது என தெரியவில்லை. அதிமுகவின் பாரம்பரியம் பெரியது. 55 ஆண்டை இந்த இயக்கம் கடந்துள்ளது என்று அவர் கூறியுள்ளார் என்பது குறிப்பிடத்தக்கது.

மேகதாது அணை கட்ட அனுமதிக்காதே.. திருச்சியில் விவசாயிகள் போராட்டம்!

Vinalin Sweety — Mon, 21 Sep 2026 22:37:15 +0530

கர்நாடகா அரசு மேகதாது அணை கட்டுவதில் தீவிரமாக உள்ளது. மேகதாது அணை கட்டினால் தமிழகத்திற்கு பாதிப்பு ஏற்படும் என்றும், தண்ணீர் பற்றாக்குறை ஏற்படும் என்பதாலும் தமிழகத்தில் இருந்து மேகதாது அணைக்கு எதிராக தொடர் எதிர்ப்புகள் எழுந்து வருகின்றன. இருப்பினும் மேகதாது அணை கட்ட கர்நாடகா அரசு தீவிரம் காட்டி வருகிறது. இந்த நிலையில் தான், இன்று (செப்டம்பர் 21, 2026) மேகதாது அணை கட்டுவதை எதிர்த்து திருச்சியில் விவசாயிகள் போராட்டத்தில் ஈடுபட்டனர். சாலையில் திரண்ட விவசாயிகள் தமிழக அரசே தமிழக அரசே மேகதாது அணை கட்ட அனுமதி வழங்காதே என முழக்கமிட்டனர். மேகதாது அணைக்கு எதிராக தமிழகம் முழுவதும் பல்வேறு இடங்களில் விவசாயிகள் போராட்டம் நடத்தி வரும் நிலையில், திருச்சியில் இன்று விவசாயிகள் போராட்டம் மேற்கொண்டுள்ளனர் என்பது குறிப்பிடத்தக்கது.

கொட்டித்தீர்க்கும் கனமழை.. இடுக்கியில் வீட்டை பலிகொண்ட நிலச்சரிவு.. நல்வாய்ப்பாக உயிர் தப்பிய 5 குடும்பங்கள்!!

Esakkiraja Selvarathinam — Mon, 21 Sep 2026 14:36:52 +0530

கேரள மாநிலத்தில் தென்மேற்கு பருவமழை மீண்டும் தீவிரமடைந்துள்ள நிலையில், மலை மாவட்டங்களான இடுக்கி, மலப்புறம் உள்ளிட்ட பகுதிகளில் தொடர் கனமழை வெளுத்து வாங்கி வருகிறது. இதன் காரணமாகப் பல்வேறு இடங்களில் திடீர் வெள்ளப்பெருக்கும், தொடர் நிலச்சரிவுகளும் ஏற்பட்டு மக்களின் இயல்பு வாழ்க்கை பெரிதும் பாதிக்கப்பட்டுள்ளது. குறிப்பாக, இடுக்கி மாவட்டத்தில் நிலச்சரிவு அபாயம் உள்ள பகுதிகளில் மக்கள் கடும் பீதியுடன் வசித்து வரும் நிலையில், அடிமாலி அருகே ஏற்பட்ட பயங்கர நிலச்சரிவில் வீடு ஒன்று முற்றிலுமாக இடிந்து நாசமானது. எனினும், உரிய நேரத்தில் மக்கள் சுதாரித்து வெளியேறியதால் பெரும் உயிர்ச்சேதம் தவிர்க்கப்பட்டுள்ளது.

அடிமாலியில் பயங்கர நிலச்சரிவு - ஒரு வீடு தரைமட்டம்:

இடுக்கி மாவட்டம் மூணார்-வட்டவடா பாதையில் ஏற்கனவே நிலச்சரிவு ஏற்பட்டிருந்த நிலையில், அடிமாலி அருகேயுள்ள பழம்பள்ளிச்சல் (Pazhampallichal) பகுதியில் திங்கள்கிழமை மீண்டும் ஒரு கடுமையான நிலச்சரிவு ஏற்பட்டது. மலையிலிருந்து சரிந்து வந்த பெரும் பாறைகளும், சேறும் சகதியும் குடியிருப்புப் பகுதிகளை நோக்கி சீறிப்பாய்ந்தன. இந்த அசாத்திய வேகத்தில் வந்த நிலச்சரிவில் சிக்கி, அப்பகுதியில் இருந்த ஒரு குடியிருப்பு வீடு முற்றிலும் இடிந்து தரைமட்டமானது. நிலச்சரிவு ஏற்பட்ட காட்சி மற்றும் வீட்டின் அழிவு தொடர்பான தகவல்கள் மற்றும் வீடியோக்கள் வெளியாகி பெரும் அதிர்ச்சியை ஏற்படுத்தியுள்ளன.

ராமேஸ்வரத்தில் கோலாகலமாக நடைபெற்ற விஸ்வகர்மா ஜெயந்தி விழா.. பூத்தட்டு ஊர்வலம், சிறப்பு அபிஷேகம்!!

Esakkiraja Selvarathinam — Mon, 21 Sep 2026 14:23:42 +0530

புனிதத் தலமான ராமேஸ்வரத்தில் அமைந்துள்ள ஆன்மீக மற்றும் வரலாற்றுச் சிறப்புமிக்க திருத்தலங்களில் கீழரத வீதியில் வீற்றிருக்கும் ஸ்ரீ அக்கசாலை விநாயகர் திருக்கோவிலும் ஒன்றாகும். உலகப் படைப்புக்கும் கட்டிடக் கலை மற்றும் கைவினைத் தொழில்களுக்கும் மூலக் கடவுளாகப் போற்றப்படும் ஸ்ரீ விஸ்வகர்மா பகவானைப் போற்றும் வகையில் ஆண்டுதோறும் விஸ்வகர்மா ஜெயந்தி விழா வெகுவிமர்சையாகக் கொண்டாடப்பட்டு வருகிறது. அந்த வகையில், ராமேஸ்வரம் விஸ்வகர்ம ஐந்தொழில் சங்கத்திற்குப் பாத்தியப்பட்ட இத்திருக்கோவிலில், பாரம்பரியம் மாறாமல் பக்திச் பரவசத்துடன் இந்த ஆண்டிற்கான விஸ்வகர்மா ஜெயந்தி விழா சிறப்பாகக் கொண்டாடப்பட்டது.

30 ஆண்டு கால பாரம்பரிய பூத்தட்டு ஊர்வலம்:

ராமேஸ்வரம் விஸ்வகர்ம ஐந்தொழில் சங்கத்தின் சார்பில் கடந்த 30 ஆண்டுகளாகத் தொடர்ச்சியாக இந்த ஜெயந்தி விழா மிகச் சிறப்பாக நடத்தப்பட்டு வருகிறது. விழாவின் முக்கிய நிகழ்வாக, பக்தர்கள் மற்றும் ஊர் பொதுமக்கள் திரளாகப் பங்கேற்ற வண்ணமயமான ஊர்வலம் நடைபெற்றது. குறிப்பாக, திரளான பெண்கள் தங்களது கைகளில் வண்ண மலர்களால் அலங்கரிக்கப்பட்ட பூத்தட்டுகளை ஏந்தி வர, மங்கள வாத்தியங்கள் முழங்க ஊர்வலம் தொடங்கியது. ராமேஸ்வரத்தின் நான்கு ரத வீதிகளின் வழியாகப் பக்திப் பாடல்கள் முழங்க வலம் வந்த இந்த பூத்தட்டு ஊர்வலம், இறுதியாக ஸ்ரீ அக்கசாலை விநாயகர் ஆலயத்தை வந்தடைந்தது.

குட்டியுடன் ஆற்றில் குளித்த யானைகள்: தாய் யானையின் வைரல் வீடியோ..

Aarthi Govindaraman — Sat, 19 Sep 2026 07:56:11 +0530

கோவை மதுக்கரை அருகே குட்டி யானையுடன் ஆற்றில் குளித்து மகிழ்ந்த 3 காட்டு யானைகளின் காட்சிகள் இணையத்தில் வைரலாகி வருகின்றன. மதுக்கரை சுற்றுவட்டாரத்தில் வெயிலின் தாக்கம் அதிகரித்துள்ள நிலையில், புதுப்பதி கிராமம் அருகே உள்ள ஆற்றுக்கு குட்டியுடன் வந்த யானைகள் தண்ணீர் அருந்தி, நீரில் குளித்து மகிழ்ந்தன. பின்னர் வனப்பகுதியை நோக்கி சென்றபோது, குட்டி யானையின் முன்னங்காலில் காயம் இருப்பது தெரியவந்தது. வலியால் மெதுவாக தள்ளாடி நடந்த குட்டியை தாய் யானை தனது தும்பிக்கையால் அரவணைத்து பாதுகாப்பாக வனப்பகுதிக்குள் அழைத்துச் சென்றது. இந்த நெகிழ்ச்சியான காட்சியை அவ்வழியாகச் சென்றவர்கள் செல்போனில் பதிவு செய்துள்ளனர். வீடியோ சமூக வலைதளங்களில் வைரலாகி வருகிறது. காயமடைந்த குட்டி யானைக்கு வனத்துறை மருத்துவக் குழுவினர் உடனடியாக சிகிச்சை அளிக்க வேண்டும் என வன ஆர்வலர்கள் கோரிக்கை விடுத்துள்ளனர்.

அமைச்சர் சொன்னால் நாங்க கேட்கனுமா…? ரேஷன் கடை ஊழியரின் அடவடி பேசிய வீடியோ வைரல்

Vinoth V — Fri, 18 Sep 2026 17:09:26 +0530

திருவாரூர் மாவட்டம், ஈபி காலணியில் செயல்பட்டு வரும் நியாயவிலை கடை எண் 18AP041PN கடையில் பொருட்கள் வாங்க செல்லும் வெளியூர் மற்றும் வேறு கடையில் குடும்ப அட்டை வைத்துள்ள சாமானிய மக்களுக்கு பொருட்கள் வழங்க முடியாது என்றும், அவ்வாறு வழங்க கூடாது என அதிகாரிகள் தங்களுக்கு உத்தவிட்டுள்ளதாகவும், அரசு போதுமான அளவு பொருட்கள் கடைகளுக்கு அனுப்புவது இல்லை என்று அரசு மீது குற்றச்சாட்டை ஆணவத்துடன் பேசி அனுப்பி வருகின்றனர். தற்போது அது தொடர்பான வீடியோ அமைச்சர் உத்தரவிற்கு இவ்வளவுதான் மரியாதையா..? என சமூக வலைத்தளங்களில் வைராக பரவி வருகிறது. தமிழக சட்டசபையில் உணவு மற்றும் நுகர்வோர் பாதுகாப்பு, கூட்டுறவு துறைகளின் மீதான மானிய கோரிக்கை மீது விவாதம் நடந்தது. இதில் உணவு மற்றும் நுகர்வோர் பாதுகாப்பு துறையின் மீதான மானிய கோரிக்கையில் அமைச்சர் பி வெங்கடரமணன் பேசினார். அப்போது அவர் கூறுகையில், நியாய விலைக்கடைகளில் பொருட்கள் வாங்கும் மக்கள் தங்களுக்குரிய கடைகளில் மட்டும் தான் பெருட்கள் வாங்க வேண்டும் என்ற கட்டாயம் இல்லை. தமிழ்நாட்டில் எந்த கடைகளில் வேண்டுமானாலும் ரேVஷன் பொருட்களை வாங்கி கொள்ளலாம். நியாய விலை அட்டை கையில் இல்லாவிட்டாலும் அட்டையின் 'சாப்ட் காப்பி' மொபைல் போனில்இருந்தால் கூட பொருட்களை வாங்கி கொள்ளலாம்''என்று கூறி இருந்தார். இந்த உத்தரவை பல்வேறு ரேஷன் கடை ஊழியர்கள் மதிக்காமல் புதிய தவெக அரசிற்கு அவப்பெயரை ஏற்படுத்தி வருகின்றன என்றார்.

கூடலூரில் இருவரை கொன்ற புலி பிடிபட்டது!

Aarthi Govindaraman — Fri, 18 Sep 2026 13:33:09 +0530

கூடலூர் வனக்கோட்டம், ஓவேலி வனச்சரகப் பகுதியில் இரண்டு பேரைத் தாக்கிக் கொன்ற புலி, வனத்துறையினரின் தீவிர நடவடிக்கைக்குப் பின் பிடிபட்டது. புலியின் நடமாட்டத்தைக் கண்காணிக்க முதுமலை புலிகள் காப்பகம், நடுவட்டம் உள்ளிட்ட பகுதிகளில் 305 தானியங்கி மற்றும் GSM கேமராக்கள் பொருத்தப்பட்டு 24 மணி நேரமும் கண்காணிக்கப்பட்டது. மேலும், புலியைப் பிடிக்க 14 இடங்களில் பிரத்யேக கூண்டுகள் அமைக்கப்பட்டன. 100-க்கும் மேற்பட்ட வனத்துறை சிறப்புப் படையினர் பாதுகாப்புப் பணியில் ஈடுபட்டு, புலியைப் பிடிக்கும் நடவடிக்கையைத் தீவிரப்படுத்தினர். நிலைமையின் தீவிரத்தைக் கருத்தில் கொண்டு வனத்துறை அமைச்சர் R.V. இரஞ்சித்குமார் கூடலூர் பகுதிக்குச் சென்று கள ஆய்வு மேற்கொண்டார். தற்போது புலி பிடிபட்டுள்ளதால், கூடலூர் மற்றும் சுற்றுவட்டார கிராம மக்கள் நிம்மதி அடைந்துள்ளனர்.

தடாகத்தில் மாட்டை தாக்க முயன்ற காட்டு யானை.. வெளியான சிசிடிவி காட்சிகள்..

Aarthi Govindaraman — Fri, 18 Sep 2026 07:46:35 +0530

கோவை மாவட்டம் தடாகம், மாங்கரை, சோமையனூர், பன்னிமடை, நஞ்சுண்டாபுரம் உள்ளிட்ட மேற்கு தொடர்ச்சி மலையடிவாரப் பகுதிகளில் காட்டு யானைகள் நடமாட்டம் அதிகரித்துள்ளது. இந்நிலையில், நள்ளிரவில் வனப்பகுதியில் இருந்து வெளியேறிய ஒற்றைக் காட்டு யானை, தடாகம் உச்சயனூர் பகுதியில் சுற்றித்திரிந்துள்ளது. பின்னர் எஸ்.எம். நகர் பகுதியில் உள்ள மாட்டு கொட்டகைக்குள் புகுந்து மாட்டு தீவனங்களை தின்றுள்ளது. இதையடுத்து அங்கு கட்டி வைக்கப்பட்டிருந்த மாடுகள் கத்தியதால், ஆத்திரமடைந்த யானை ஒரு மாட்டை தாக்க முயன்றது. அதிர்ஷ்டவசமாக அந்த மாடு தாவி குதித்து தப்பியதால், யானை அங்கிருந்து சென்றது. இந்த சம்பவத்தின் சிசிடிவி காட்சிகள் தற்போது வெளியாகி பரபரப்பை ஏற்படுத்தியுள்ளன. யானைகள் நடமாட்டம் அதிகமாக உள்ளதால், வனத்துறையினர் இரவு நேர ரோந்து பணிகளை தீவிரப்படுத்த வேண்டும் என பொதுமக்கள் கோரிக்கை விடுத்துள்ளனர்.

17 ஆண்டுகளுக்குப் பிறகு மதுரை மீனாட்சியம்மன் கோயிலில் மகா கும்பாபிஷேகம்!

Aarthi Govindaraman — Thu, 17 Sep 2026 13:25:14 +0530

17 ஆண்டுகளுக்குப் பிறகு உலகப் பிரசித்தி பெற்ற மதுரை மீனாட்சியம்மன் கோயிலில் மகா கும்பாபிஷேக விழா வெகு விமரிசையாக நடைபெற்றது. இதற்காக கோயில் வளாகம் முழுவதும் பல மாதங்களாக திருப்பணிகள் மேற்கொள்ளப்பட்டன. செப்டம்பர் 11ஆம் தேதி முதல் கால பூஜைகள் தொடங்கிய நிலையில், 400க்கும் மேற்பட்ட சிவாச்சாரியார்கள் பங்கேற்றனர். காலை 7.40 மணிக்கு கோபுரங்களுக்கு கும்பாபிஷேகம் நடைபெற்றது. தொடர்ந்து காலை 8.10 மணிக்கு மீனாட்சி அம்மனுக்கும், 8.50 மணிக்கு சுந்தரேஸ்வரருக்கும் புனித நீர் ஊற்றி மகா கும்பாபிஷேகம் நடைபெற்றது. காலை 10 மணி முதல் பக்தர்கள் தரிசனத்திற்கு அனுமதிக்கப்பட்டனர். லட்சக்கணக்கான பக்தர்கள் திரண்டு சுவாமி தரிசனம் செய்து வருகின்றனர். கும்பாபிஷேகத்தின்போது கோபுரங்களின் கீழ் இருந்த பக்தர்கள் மீது புனித நீர் தெளிக்கப்பட்டது. இன்று இரவு 7 மணிக்கு நான்கு மாசி வீதிகளிலும் மீனாட்சி சுந்தரேஸ்வரர் வீதி உலா நடைபெற உள்ளது. இதனால் மதுரை மாநகரமே விழாக்கோலம் பூண்டுள்ளது.

மீனாட்சியம்மன் கோயில் கும்பாபிஷேகம்.. விழாக்கோலம் பூண்ட மதுரை..

Aarthi Govindaraman — Thu, 17 Sep 2026 07:28:39 +0530

உலகப் புகழ்பெற்ற மதுரை மீனாட்சியம்மன் கோயில் மகா கும்பாபிஷேகம் இன்று (செப்.17) வெகு விமரிசையாக நடைபெற்றது. விழாவை முன்னிட்டு ரூ.25 கோடி மதிப்பில் திருப்பணிகள் மேற்கொள்ளப்பட்டு, தீ விபத்தில் சேதமடைந்த வீர வசந்தராயர் மண்டபமும் புனரமைக்கப்பட்டது. வடக்கு ஆடி வீதியில் 184 குண்டங்களுடன் அமைக்கப்பட்ட யாகசாலையில் செப்.11 முதல் கால பூஜைகள் நடைபெற்றன. 400-க்கும் மேற்பட்ட சிவாச்சாரியார்கள் பங்கேற்றனர். காலை 7.40 மணிக்கு கோபுரங்களுக்கு கும்பாபிஷேகம் நடைபெற்ற நிலையில், 8.10 மணிக்கு மீனாட்சி அம்மனுக்கும், 8.50 மணிக்கு சுந்தரேஸ்வரருக்கும் புனித நீர் ஊற்றி மகா கும்பாபிஷேகம் நடைபெற்றது. லட்சக்கணக்கான பக்தர்கள் வருகையையொட்டி ஆயிரக்கணக்கான போலீசார் பாதுகாப்புப் பணியில் ஈடுபட்டனர். இன்று இரவு 7 மணிக்கு நான்கு மாசி வீதிகளிலும் சுவாமி வீதி உலா நடைபெற உள்ளது.

மதுரை மீனாட்சி அம்மன் கோயில் கும்பாபிஷேகம்.. இன்று 7வது கட்ட யாகசாலை பூஜை!

Vinalin Sweety — Tue, 15 Sep 2026 22:11:35 +0530

மதுரை மீனாட்சி அம்மன் கோயில் கும்பாபிஷேக விழா செப்டம்பர் 17, 2026 அன்று வெகு விமரிசையாக நடைபெற உள்ளது. குறிப்பாக, செப்டம்பர் 11, 2026 முதலே பூர்வாங்க பூஜைகள் தொடங்கி வெகு விமரிசையாக நடைபெற்று வருகிறது. கும்பாபிஷேகத்தை முன்னிட்டு கோயில் கோபுரங்கள் வண்ண விளக்குகளால் அலங்கரிக்கப்பட்டுள்ள நிலையில், கோயில் முழுவதும் மலர்களால் அலங்காரம் செய்யப்பட்டுள்ளது. இந்த நிலையில், மதுரை மீனாட்சி அம்மன் கோயிலில் இன்று (செப்டம்பர் 16, 2026) 7வது கட்ட யாகசாலை பூஜை நடைபெற்றது. இதனை மதுரை ஆதீனம் நடத்தி வைத்த நிலையில், கோயிலுக்கு வந்த ஏராளமான பக்தர்கள் மற்றும் பொதுமக்கள் மிகுந்த பக்தியுடன் சுவாமி தரிசனம் செய்து சென்றனர். இதனால், கோயில் முழுவதும் மக்கள் கூட்டம் அலைமோதியது.

கும்பாபிஷேகத்திற்கு தயராகும் மதுரை மீனாட்சி அம்மன் கோயில்.. வண்ண விளக்குகளால் ஜொலிக்கும் கோபுரங்கள்!

Vinalin Sweety — Tue, 15 Sep 2026 12:51:57 +0530

மதுரை மீனாட்சி அம்மன் கோயிலில் செப்டம்பர் 17, 2026 அன்று மகா கும்பாபிஷேகம் வெகு விமரிசையாக நடைபெற உள்ளது. கும்பாபிஷேகத்திற்கான பூர்வாங்க பூஜைகள் செப்டம்பர் 11, 2026 முதலே தொடங்கி வெகு சிறப்பாக நடைபெற்று வருகின்றன. இந்த நிலையில் தான், கோயில் கோபுரங்கள் முழுவதும் வண்ண விளக்குகளால் அலங்கரிக்கப்பட்டுள்ளன. கோயில் கோபுரங்கள், பிரகாரங்கள், மூலவர் சன்னதிகள், கொடிமரங்கள் என அனைத்து இடங்களும் வண்ண விளக்குகளால் அலங்கரிக்கப்பட்டுள்ளன. அதுமட்டுமன்றி, கோயில் முழுவதையும் அலங்கரிக்க சுமார் 5 டன் வண்ண மலர்களும் வந்து இறங்கியுள்ளன. அரளிப்பூ, இருவாச்சி பூக்கள், மஞ்சள், வெள்ளை, ஆரஞ்சு என பல வண்ணங்களில் கோயில் முழுவதையும் அலங்கரிக்க வண்ண மலர்கள் வந்து இறங்கியுள்ளன. இந்த மகா கும்பாபிஷேகத்திற்கு ஏராளமான பக்தர்கள் வருகை புரிவார்கள் என எதிர்ப்பார்க்கப்படுவதால் அங்கு போலீஸ் பாதுகாப்பு பலப்படுத்தப்பட்டுள்ளது.

மதுரை மீனாட்சி அம்மன் கோயிலுக்கு வந்த ‘பார்வதி’ யானை!

Vinalin Sweety — Mon, 14 Sep 2026 23:25:39 +0530

மீனாட்சி அம்மன் கோவிலில் ஏற்கனவே ‘பார்வதி’ என்ற பெண் யானை ஒன்று உள்ள நிலையில் தற்போது மதுரை மீனாட்சி அம்மன் கோவிலுக்கு அசாம் மாநிலத்தில் இருந்து துர்கா என்கிற 5 வயது பெண் யானை ஒன்று வாங்கப்பட்டுள்ளது. கடந்த சில நாட்களுக்கு முன்பாக ஒட்டகமும் வாங்கப்பட்டு மதுரை மீனாட்சி அம்மன் கோவில் கொண்டுவரப்பட்டது. கோயில்களுக்குப் புதிதாக யானைகள் வாங்கவோ, தானமாகப் பெறவோ கூடாது என்று தனி நீதிபதி விதித்திருந்த தடையை, சென்னை உயர் நீதிமன்ற அமர்வு அண்மையில் ரத்து செய்து உத்தரவிட்டு இருந்த நிலையில் அசாம் மாநிலத்தில் இருந்து 'துர்கா' என்ற பெண் யானை மதுரை மீனாட்சியம்மன் கோயிலுக்குக் கொண்டு வர வனத்துறை ஒப்புதல் அளித்திருந்தது. அசாமில் உள்ள மானஸ் தேசிய பூங்காவில் இருந்து சுமார் 3,000 கிலோமீட்டர் பயணம் செய்து இந்த 5 வயது பெண் யானை மதுரை மீனாட்சி அம்மன் கோவிலுக்கு அழைத்து வரப்பட்டுள்ளது. விநாயகர் சதுர்த்தியையொட்டி கோவில் வளாகத்திற்கு வந்தடைந்த இந்த யானைக்கு பணியாளர்கள் மற்றும் பக்தர்கள் மலர் தூவி வரவேற்பு அளித்தனர்.

கோவை வடவள்ளியில் பரவசமூட்டிய வள்ளி கும்மியாட்டம்..

Aarthi Govindaraman — Mon, 14 Sep 2026 22:16:01 +0530

கோவை வடவள்ளி பி.என்.புதூர் 41-வது வார்டில் இந்து முன்னணி, பாரதிய ஜனதா கட்சி மற்றும் பொதுமக்கள் சார்பில் 13-ஆம் ஆண்டு விநாயகர் சதுர்த்தி விழா வெகு விமரிசையாக நடைபெற்றது. இதையொட்டி பிரம்மாண்ட விநாயகர் சிலை பிரதிஷ்டை செய்யப்பட்டு, கணபதி ஹோமம், சிறப்பு அபிஷேகம் மற்றும் தீபாராதனைகள் நடைபெற்றன. இதில் திரளான பக்தர்கள் கலந்து கொண்டு சாமி தரிசனம் செய்தனர். விழாவின் சிறப்பம்சமாக, கொங்கு மண்டலத்தின் பாரம்பரிய நாட்டுப்புறக் கலையான வள்ளி கும்மியாட்டம் நடைபெற்றது. சிறுமிகள் முதல் வயதான பெரியவர்கள் வரை பாரம்பரிய சீருடை அணிந்து, ஒரே நேர்த்தியான முறையில் கைகளைத் தட்டி கும்மியாடினர். இதனை நூற்றுக்கணக்கான பொதுமக்கள் நேரில் கண்டு ரசித்து, கைதட்டி உற்சாகப்படுத்தினர். தொடர்ந்து பக்தர்களுக்கு சிறப்பு நெய்வேத்தியப் பிரசாதங்கள் மற்றும் அன்னதானம் வழங்கப்பட்டது.

இருசக்கர வாகனத்தில் விநாயகர் சிலையை அழைத்துச் சென்ற நபர்.. வைரல் வீடியோ..

Aarthi Govindaraman — Mon, 14 Sep 2026 20:55:55 +0530

விநாயகர் சதுர்த்தியை முன்னிட்டு திருப்பத்தூர் மற்றும் சுற்றுவட்டாரப் பகுதிகளில் விநாயகர் சிலைகள் விற்பனை விறுவிறுப்பாக நடைபெற்று வருகிறது. பொதுமக்கள் மற்றும் இளைஞர்கள் பல்வேறு வடிவங்களில் உள்ள விநாயகர் சிலைகளை வாங்கிச் செல்கின்றனர். இந்நிலையில், திருப்பத்தூர் பகுதியைச் சேர்ந்த வாலிபர் ஒருவர் பூஜைக்காக விநாயகர் சிலையை வாங்கியுள்ளார். அந்த சிலையை தனது இருசக்கர வாகனத்தில் சக பயணியைப் போல அமர வைத்து, அன்புடன் வீட்டிற்கு அழைத்துச் சென்றுள்ளார். பொதுவாக விநாயகர் சிலைகள் லாரி அல்லது ஆட்டோக்களில் எடுத்துச் செல்லப்படும் நிலையில், வாலிபர் ஒருவர் இருசக்கர வாகனத்தில் சிலையை அமர வைத்து அழைத்துச் சென்ற காட்சி பார்ப்போரை நெகிழச் செய்துள்ளது. இதனை அப்பகுதியில் இருந்த சிலர் வீடியோ எடுத்து சமூக வலைத்தளங்களில் பதிவிட்டுள்ளனர். தற்போது அந்த வீடியோ வைரலாகி வருகிறது.

சாடிவயல் யானைகள் முகாமில் விநாயகர் சதுர்த்தி விழா.. யானைகளுக்கு சிறப்பு பூஜை..

Aarthi Govindaraman — Mon, 14 Sep 2026 20:36:13 +0530

விநாயகர் சதுர்த்தியை முன்னிட்டு, கோவை வனக்கோட்டம் போளுவாம்பட்டி வனச்சரகத்துக்கு உட்பட்ட சாடிவயல் யானைகள் முகாமில் கும்கி யானைகளுக்கு சிறப்புப் பூஜைகள் நடைபெற்றன. முகாமில் உள்ள ‘சுயம்பு’, ‘பாரி’ உள்ளிட்ட கும்கி யானைகளை வனத்துறையினர் மற்றும் பாகன்கள் அதிகாலையில் நொய்யல் ஆற்றில் குளிப்பாட்டி, நெற்றியில் திருநீறு, சந்தனம், குங்குமம் வைத்து மாலைகள் அணிவித்து அலங்கரித்தனர். தொடர்ந்து விநாயகர் படத்துக்கு சிறப்புப் பூஜைகள் செய்யப்பட்டு, கும்கி யானைகளுக்கு மங்கள வாத்தியங்கள் முழங்க ‘கஜ பூஜை’ நடைபெற்றது. பூஜை நிறைவடைந்ததும் யானைகளுக்கு கரும்பு, வாழைப்பழம், ஆப்பிள், அன்னாசி, தேங்காய் உள்ளிட்ட பழங்களும், அரிசி, வெல்லம் மற்றும் சத்து மாவு உருண்டைகள் உள்ளிட்ட உணவுகளும் வழங்கப்பட்டன. இதில் வனத்துறை அதிகாரிகள், வனக்காப்பாளர்கள், வனக்காவலர்கள் மற்றும் யானைப் பாகன்கள் கலந்து கொண்டனர்.

கோவையில் 50 கிலோ சந்தனம், 2 டன் மலர்களால் புலியகுளம் முந்தி விநாயகருக்கு பிரம்மாண்ட ராஜ அலங்காரம்!

Sekaran S — Mon, 14 Sep 2026 14:33:27 +0530

விநாயகர் சதுர்த்தி பண்டிகை இன்று நாடு முழுவதும் மிகுந்த பக்தி பரவசத்துடனும் உற்சாகத்துடனும் கோலாகலமாகக் கொண்டாடப்பட்டு வருகிறது. பண்டிகையை முன்னிட்டுத் தமிழகத்தில் உள்ள அனைத்து விநாயகர் திருக்கோவில்களிலும் அதிகாலை முதலே நடை திறக்கப்பட்டு, சிறப்பு அபிஷேகங்கள், யாகங்கள் மற்றும் அலங்கார பூஜைகள் மிக விமரிசையாக நடைபெற்று வருகின்றன.

ஆசியாவிலேயே மிகப்பெரிய ஒற்றைக்கல் விநாயகர்

கோவை நகரின் பிரசித்தி பெற்ற வழிபாட்டுத் தலங்களில் ஒன்றான புலியகுளம் முந்தி விநாயகர் திருக்கோவில், வரலாற்றுச் சிறப்புமிக்க ஒன்றாகும். இங்கு வீற்றிருக்கும் விநாயகர் திருவுருவச் சிலை ஆசிய கண்டத்திலேயே மிகப்பரிய ஒற்றைக்கல் சிலையாகப் போற்றப்படுகிறது. சுமார் 190 டன் எடையும், 19 அடி உயரமும், 10 அடி அகலமும் கொண்ட இந்த பிரம்மாண்ட திருமேனி, கோவை மற்றும் சுற்றுவட்டாரப் பகுதி மக்களின் வழிபாட்டு மையமாகத் திகழ்கிறது.

50 கிலோ சந்தனம், 2 டன் மலர்களால் ராஜ அலங்காரம்

இன்றைய விநாயகர் சதுர்த்தி திருநாளை முன்னிட்டு, புலியகுளம் முந்தி விநாயகருக்குச் சிறப்புச் சந்தன காப்பு சாத்தப்பட்டு ராஜ அலங்காரம் செய்யப்பட்டுள்ளது. இந்த விசேஷ அலங்காரத்திற்காகச் சுமார் 50 கிலோ தூய சந்தனமும், 2 டன் அளவிலான வண்ணமயமான நறுமண மலர்களும் பயன்படுத்தப்பட்டுள்ளன. இதுமட்டுமின்றி, விநாயகர்பெருமானுக்குப் பிரம்மாண்டமான மயில் தோகை மாலையும் அணிவிக்கப்பட்டிருப்பது இந்த ஆண்டின் கூடுதல் சிறப்பம்சமாக அமைந்து பக்தர்களைச் பரவசத்தில் ஆழ்த்தியுள்ளது.

சேலத்தில் 300 வகையான சீர்வரிசைகளுடன் கல்யாண கோலத்தில் சித்தி புத்தி விநாயகர்!

Sathis S — Mon, 14 Sep 2026 14:21:04 +0530

சேலம், செப்டம்பர் 14: நாடு முழுவதும் விநாயகர் சதுர்த்தி விழா இன்று மிகுந்த பக்தியுடனும் உற்சாகத்துடனும் கோலாகலமாகக் கொண்டாடப்பட்டு வருகிறது. மக்களின் மனதில் நீங்காத இடம்பெற்ற இறைவனான விநாயகப் பெருமானை வழிபடக் கோவில்களிலும், பொது இடங்களிலும் விசேஷ பூஜைகள் மற்றும் அலங்காரங்கள் செய்யப்பட்டு வருகின்றன. இதன் ஒரு பகுதியாக, சேலம் மாவட்டம் முழுவதும் நூற்றுக்கும் மேற்பட்ட இடங்களில் பொதுமக்களின் பார்வைக்காகவும் வழிபாட்டிற்காகவும் பல்வேறு கலைநயமிக்க வடிவங்களில் பிரம்மாண்டமான விநாயகர் சிலைகள் பிரதிஷ்டை செய்யப்பட்டு வீற்றிருக்கின்றன.

சேலம் செவ்வாய்பேட்டையில் அபூர்வக் கோலம்:

சேலம் மாநகர் செவ்வாய்பேட்டை பகுதியில், 'எலைட் நண்பர்கள் குழு' சார்பில் ஆண்டுதோறும் விநாயகர் சதுர்த்தி விழா சிறப்பாகக் கொண்டாடப்பட்டு வருகிறது. அந்த வகையில், நடப்பு ஆண்டில் தங்களது 46-வது ஆண்டு படைப்பாக, சித்தி மற்றும் புத்தியுடன் திருமணக் கோலத்தில் காட்சியளிக்கும் சித்தி புத்தி விநாயகரின் திருவுருவச் சிலையை அவர்கள் பிரதிஷ்டை செய்துள்ளனர். புதுமையான மற்றும் தத்ரூபமான அமைப்பில் காட்சியளிக்கும் இந்தச் சிலை, அப்பகுதிக்கு வரும் பக்தர்களையும் பார்வையாளர்களையும் பெரிதும் கவர்ந்து வருகிறது.

பக்தர்கள் திரண்டு சுவாமி தரிசனம்:

அரிய வகை அலங்காரத்துடனும், பிரம்மாண்டமான சீர்வரிசைகளுடனும் காட்சியளிக்கும் இந்த சித்தி புத்தி விநாயகரைத் தரிசிக்கச் சேலம் நகர்ப்புறப் பகுதிகள் மட்டுமின்றி, மாவட்டத்தின் பல்வேறு கிராமப் பகுதிகளில் இருந்தும் ஏராளமான பக்தர்கள் குடும்பம் குடும்பமாக வருகை தந்து வழங்கி வருகின்றனர். நீண்ட வரிசையில் நின்று சுவாமி தரிசனம் செய்து வரும் பக்தர்கள், இந்தத் தனித்துவமான ஏற்பாட்டையும் கலைநயத்தையும் மனதாரப் பாராட்டிச் செல்கின்றனர்.

“கொளத்தூர் முன்னாள் MLA வளர்த்த லட்சணம் இதுதான்!”.. சேகர் பாபு பேச்சை சுட்டிக்காட்டி அமைச்சர் ரமேஷ் விளாசல்!!

Esakkiraja Selvarathinam — Sun, 13 Sep 2026 08:43:34 +0530

செப்டம்பர், 13: தமிழ்நாடு அரசியலில் அரசியல் நாகரிகமும் மேடைப் பேச்சுகளின் தரமும் நாளுக்கு நாள் குறைந்து வருவது குறித்து தொடர்ச்சியான விவாதங்கள் எழுந்து வருகின்றன. குறிப்பாக, அரசியல் தலைவர்கள் மற்றும் அமைச்சர்கள் பொதுமேடைகளில் பயன்படுத்தும் வார்த்தைகள் குறித்து பிற அரசியல் கட்சியினர் கடும் கண்டனங்களை பதிவு செய்து வருகின்றனர். இந்நிலையில், ஆளும் திமுக அரசின் செயல்பாடுகள் குறித்தும், முன்னாள் அமைச்சர் பி.கே. சேகர் பாபுவின் சமீபத்திய மேடைப் பேச்சு குறித்தும் தமிழக வெற்றிக் கழகத்தின் அமைச்சர் ரமேஷ் ஊடகவியலாளர்கள் சந்திப்பில் தனது கடுமையான கண்டனங்களையும் விமர்சனங்களையும் முன்வைத்துள்ளார். இதையும் படிக்க: திமுக அடிபட்ட புலியாக களத்தில் இருக்கிறது.. வட்டியும், முதலுமாக திருப்பி கொடுப்போம்.. பி.கே.சேகர் பாபு ஆவேசம்!

கீழ்தரமாக பேசுவதே திமுகவின் அரசியல்:

திமுகவின் தற்போதைய அரசியல் கலாச்சாரம் குறித்து பேசிய அமைச்சர் ரமேஷ், இன்றைக்கு பள்ளி சிறுவர்களிடம் கேட்டால் கூட திமுகவின் அரசியல் என்னவென்று மிகத் தெளிவாகக் கூறிவிடுவார்கள் என்று சாடினார். ஆபாசமாகவும், அவதூறாகவும், கீழ்த்தரமாகவும் பேசுவது மட்டும்தான் திமுகவின் அரசியலாக உருவெடுத்துள்ளது என்றும், கருத்தியல் ரீதியாக பேசுவதற்கோ விவாதிப்பதற்கோ அந்த கட்சியில் தகுதியான ஆட்களே இல்லை என்றும் அவர் குற்றம் சாட்டினார். மேலும், பேரறிஞர் அண்ணா அவர்கள் போற்றி வளர்த்த கடமை, கண்ணியம், கட்டுப்பாடு என்ற கொள்கைகளில் ஒன்றைக் கூடப் பின்பற்றாத நிலைக்கு இன்றைக்கு திமுக தள்ளப்பட்டிருப்பதாக அவர் தெரிவித்தார்.

அரசியல் நாகரிகத்திற்கு எதிரானது:

முன்னாள் அமைச்சர் சேகர் பாபுவின் பேச்சை சுட்டிக்காட்டிய அவர், இந்து சமய அறநிலையத்துறையை நிர்வகித்த ஒரு முன்னாள் அமைச்சர், ஆன்மீக ஸ்தலங்களை வழிநடத்திய ஒருவர் பொதுமேடையில் மிகக் கேவலமான வார்த்தைகளைப் பயன்படுத்திப் பேசுவது அதிர்ச்சியளிக்கிறது என்றார். சேகர் பாபு மேடையில் பேசிய தரமற்ற வார்த்தைகளை அவருடைய வீட்டில் உள்ள பெண்களோ அல்லது பேரக்குழந்தைகளோ உட்கார்ந்து கேட்க முடியுமா என்றும், இத்தகைய கீழ்த்தரமான பேச்சுகள் அரசியல் நாகரிகத்திற்கு முற்றிலும் எதிரானது என்றும் அவர் கேள்வியெழுப்பினார். திமுகவில் அரசியல் நாகரிகம் என்பது முற்றிலும் அழிந்துபோய்விட்டதாக அவர் சாடினார். இதையும் படிக்க: தவெக அரசின் 4 மாத ஆட்சி சாதனை அல்ல… பெரும் வேதனை… திராவிட கழக வீரமணி கடும் தாக்கு!

முதல்வர் எங்களுக்குக் கற்றுத்தரவில்லை:

மேலும், தங்களது முதல்வரின் வழிகாட்டுதல் குறித்துப் பேசிய ரமேஷ், எதிராளிகளை நோக்கி எல்லை மீறி கீழ்த்தரமாகப் பேசுவதை தங்களது முதலமைச்சர் தங்களுக்குக் கற்றுத்தரவில்லை என்றும், கண்ணியமாகவும் நேர்மையாகவும் பேசவே தங்களுக்குப் பயிற்சியளிக்கப்பட்டிருப்பதாகவும் சுட்டிக்காட்டினார். அதே சமயம் திமுக நிர்வாகிகளுக்குப் பதிலடி கொடுக்கும் வகையிலான வார்த்தைப் பிரயோகங்கள் தங்களுக்கும் தெரியும் என்றும், ஆனால் பண்பட்ட அரசியலையே தாங்கள் முன்னெடுப்பதாகவும் கூறினார். முன்னாள் கொளத்தூர் சட்டமன்ற உறுப்பினர் தனது கட்சியினரையும், அமைச்சர்களையும் எப்படி வளர்த்தெடுத்து பயிற்சி கொடுத்துள்ளார் என்பதற்கு சேகர் பாபுவின் இந்த பேச்சே சாட்சி என்றும் அவர் கடுமையாக விமர்சித்தார்.

ஆம்னி பேருந்தில் மின்கசிவு: 3 மணி நேரம் தவித்த பயணிகள்..

Aarthi Govindaraman — Fri, 11 Sep 2026 07:31:13 +0530

கோவை சிங்காநல்லூர் பகுதியில் தனியார் ஆம்னி பேருந்தில் திடீரென மின்கசிவு ஏற்பட்டு புகை வெளியேறியதால், பயணிகள் அலறியடித்து பேருந்தை விட்டு வெளியேறினர். இதையடுத்து, சுமார் 3 மணி நேரத்திற்கும் மேலாக மாற்றுப் பேருந்து ஏற்பாடு செய்யப்படாததால் பயணிகள் சாலையிலேயே காத்திருந்தனர். பயணிகளில் இதயப் பிரச்சனை கொண்ட குழந்தையுடன் வந்த குடும்பத்தினரும், உடல்நலக் குறைபாடு உள்ளவர்களும் இருந்ததாக கூறப்படுகிறது. இதனால் ஆத்திரமடைந்த பயணிகள், மாற்று ஏற்பாடு செய்யாத பேருந்து நிர்வாகத்தைக் கண்டித்து போராட்டத்தில் ஈடுபட்டனர். தகவலறிந்து வந்த தமிழக வெற்றிக் கழக (TVK) நிர்வாகிகள், பயணிகளுக்கு ஆதரவாக அவர்களுடன் இணைந்து திடீர் சாலை மறியலில் ஈடுபட்டனர். காவல்துறையினர் பேச்சுவார்த்தை நடத்தி, மாற்றுப் பேருந்து ஏற்பாடு செய்ய நடவடிக்கை எடுத்தனர். மின்கசிவு ஏற்பட்ட பேருந்து மற்றும் அலட்சியமாக செயல்பட்ட நிர்வாகம் மீது உரிய விசாரணை நடத்தி நடவடிக்கை எடுக்க வேண்டும் என பயணிகள் வலியுறுத்தினர்.

தொழிற்சாலை கழிவால் இளஞ்சிவப்பு நிறமாக மாறிய ஆறு; பொதுமக்கள் அதிர்ச்சி

Aarthi Govindaraman — Thu, 10 Sep 2026 13:28:10 +0530

செப்டம்பர் 10, 2026: தூத்துக்குடி மாவட்டம், மாப்பிளையூரணி பகுதியில் உள்ள உப்பாறு ஓடை ஆற்றில் தொழிற்சாலை கழிவுகள் முறையாக அகற்றப்படாமல் கொட்டப்படுவதாக புகார் எழுந்துள்ளது. இதனால், ஒரு கிலோமீட்டருக்கும் அதிகமான தூரத்துக்கு ஆற்று நீர் இளஞ்சிவப்பு நிறமாக மாறியுள்ளது. மாப்பிளையூரணி–தருவைக்குளம் சாலையில் உள்ள பாலம் முதல் இந்நிறமாற்றம் காணப்படுகிறது. ஆற்றின் கரையோரம் செயல்படும் கடல் உணவு பதப்படுத்தும் நிறுவனங்கள், நண்டு, இறால், ஆக்டோபஸ் உள்ளிட்டவற்றை ஏற்றுமதிக்காக சுத்தம் செய்து பேக்கிங் செய்கின்றன. இவற்றில் இருந்து வெளியேறும் கழிவுநீர் ஆற்றில் கலப்பதாகக் கூறப்படுகிறது. இதனால் ஆற்றில் மீன்கள் காணப்படுவதில்லை என அப்பகுதி மக்கள் தெரிவித்துள்ளனர். மேலும், மழைக்காலங்களில் அதிகளவில் கழிவுகள் நீர்நிலையில் கலப்பதாகவும் புகார் தெரிவித்துள்ளனர்.

மேட்டுப்பாளையத்தில் மீண்டும் உலா வந்த பாகுபலி யானை..

Aarthi Govindaraman — Thu, 10 Sep 2026 12:55:17 +0530

மேட்டுப்பாளையம் மற்றும் சுற்றுவட்டாரப் பகுதிகளில் கடந்த சில ஆண்டுகளாக “பாகுபலி” என அழைக்கப்படும் ஒற்றைக் காட்டு யானை நடமாடி வருகிறது. பகலில் வனப்பகுதியிலும், இரவில் விளைநிலங்களிலும் முகாமிட்டு பயிர்களை சேதப்படுத்தி வருகிறது. இதுவரை மனிதர்களை தாக்கியதில்லை என்றாலும், விவசாயிகள் கவலையில் உள்ளனர். இந்நிலையில், ஒரு வாரத்திற்கு முன்பு மற்றொரு யானையுடன் ஏற்பட்ட மோதலில் பாகுபலி யானையின் வால் பகுதியில் காயம் ஏற்பட்டது. இதையடுத்து, வனத்துறையினர் தகவலின்பேரில் வனக்கால்நடை மருத்துவர் விஜயராகவன் தலைமையிலான குழுவினர் சிகிச்சை அளித்து, தொடர்ந்து கண்காணித்து வருகின்றனர். நேற்று கோத்தகிரி சாலையில் பாகுபலி யானை உலா வந்ததால் வாகன ஓட்டிகள் அச்சமடைந்தனர். சாலையின் இருபுறமும் வாகனங்களை நிறுத்தி, யானை வனப்பகுதிக்குள் செல்ல வழிவிட்டனர். பின்னர் யானை தானாக வனப்பகுதிக்குள் சென்றது. காயம் குணமாகும் வரை யானைக்கு தொடர்ந்து சிகிச்சையும் கண்காணிப்பும் மேற்கொள்ளப்படும் என வனத்துறையினர் தெரிவித்துள்ளனர்.

புலிக்காக வைத்த கூண்டில் சிக்கிய சிறுத்தை; ஓவேலி பகுதியில் பரபரப்பு

Aarthi Govindaraman — Thu, 10 Sep 2026 07:23:24 +0530

நீலகிரி, செப்டம்பர் 10, 2026: நீலகிரி மாவட்டம், கூடலூர் அருகே ஓவேலி பாரம் பகுதியில் இரண்டு பேரை கொன்ற ஆட்கொல்லிப் புலியைப் பிடிப்பதற்காக வனத்துறையினர் கூண்டு வைத்துள்ளனர். புலியைப் பிடிப்பதற்காக அந்தக் கூண்டில் பச்சை இறை வைக்கப்பட்டிருந்தது. இந்நிலையில், எதிர்பாராத விதமாக அந்தக் கூண்டில் சிறுத்தை ஒன்று சிக்கியது. இதுகுறித்து தகவலறிந்த வனத்துறையினர் சம்பவ இடத்திற்கு விரைந்து சென்று, கூண்டில் சிக்கியிருந்த சிறுத்தையை பாதுகாப்பாக மீட்டனர். பின்னர், அந்த சிறுத்தையை அடர்ந்த வனப்பகுதிக்குள் கொண்டு சென்று விடுவித்தனர். ஏற்கனவே ஆட்கொல்லிப் புலியின் நடமாட்டத்தால் ஓவேலி பாரம் பகுதி மக்கள் அச்சத்தில் உள்ள நிலையில், புலியைப் பிடிப்பதற்காக வைக்கப்பட்ட கூண்டில் சிறுத்தை சிக்கிய சம்பவம் அப்பகுதியில் மேலும் பரபரப்பை ஏற்படுத்தியுள்ளது.

கோவையில் நள்ளிரவில் தொழிலாளர்கள் தங்கிய கொட்டகையை உடைத்த ஒற்றை யானை!

Aarthi Govindaraman — Wed, 09 Sep 2026 13:46:48 +0530

கோவை துடியலூர் அருகே நள்ளிரவில் குடியிருப்புப் பகுதிக்குள் புகுந்த ஒற்றைக் காட்டு யானை, வடமாநிலத் தொழிலாளர்கள் தங்கியிருந்த தகரக் கொட்டகையை உடைத்து சேதப்படுத்திய சம்பவம் பரபரப்பை ஏற்படுத்தியுள்ளது. பெரியநாயக்கன்பாளையம் வனச்சரகத்திற்குட்பட்ட கதிர் நாயக்கன்பாளையம் பகுதியில் நள்ளிரவு 1 மணியளவில் வனப்பகுதியை விட்டு வெளியேறிய யானை, விவசாயத் தோட்டத்திற்குள் புகுந்து பசுந்தீவனங்களை உண்டதுடன், அங்கிருந்த நாய்களையும் துரத்தியது. பின்னர், கட்டுமானத் தொழிலாளர்கள் தங்கியிருந்த தகரக் கொட்டகையை உடைத்து, உள்ளே இருந்த அரிசி உள்ளிட்ட உணவுப் பொருட்களை சேதப்படுத்தியது. யானையின் சத்தம் கேட்டு விழித்த தொழிலாளர்கள் அலறியடித்து ஓடி அருகிலிருந்த கட்டிடத்தில் தஞ்சம் புகுந்து உயிர் தப்பினர். தகவலறிந்து வந்த வனத்துறையினர், பட்டாசுகள் வெடித்தும் மேளங்கள் அடித்தும் சுமார் 2 மணி நேரம் போராடி யானையை வனப்பகுதிக்குள் விரட்டினர். இதற்கிடையில், அப்பகுதியில் தொடரும் திடீர் மின்வெட்டால் யானையின் நடமாட்டத்தை கண்காணிக்க முடியாமல் பொதுமக்கள் அச்சத்தில் உள்ளனர்.

பேருந்தில் ஆபத்தான பயணம்: கால் இடறிய மாணவன் அதிர்ஷ்டவசமாக உயிர்தப்பிய காட்சி!

Aarthi Govindaraman — Wed, 09 Sep 2026 07:40:32 +0530

மயிலாடுதுறை மாவட்டம், மயிலாடுதுறையில் இருந்து பட்டவர்த்தி, மணல்மேடு உள்ளிட்ட கிராமப்புறங்களுக்கு தினமும் நூற்றுக்கணக்கான மாணவ, மாணவிகள் பள்ளிகளுக்குச் சென்று வருகின்றனர். போதிய பேருந்துகள் இயக்கப்படாததால், மாணவர்கள் அரசு பேருந்துகளில் படிகளில் தொங்கியபடி ஆபத்தான முறையில் பயணம் செய்து வருகின்றனர். இந்நிலையில், மணல்மேடு நோக்கிச் சென்ற அரசு பேருந்தில் பள்ளி சீருடை அணிந்த மாணவன் ஒருவர், படியில் இடமின்றி ஒற்றைக் காலில் தொங்கியபடி பயணம் செய்துள்ளார். அரசு மருத்துவமனை சாலையில் பேருந்து சென்றபோது, தொடர்ந்து தொங்க முடியாமல் அவரது கால் இடறி கீழே விழும் நிலை ஏற்பட்டது. அப்போது வேகத்தடை இருந்ததால், நல்வாய்ப்பாக மாணவன் கீழே விழாமல் தடுமாறியபடி மீண்டும் பேருந்துடன் ஓடியுள்ளார். இந்தக் காட்சியை சாலையில் சென்றவர்கள் செல்போனில் பதிவு செய்து சமூக வலைதளங்களில் வெளியிட்டுள்ளனர். வீடியோ தற்போது வைரலாகி வரும் நிலையில், மாணவர்களின் பாதுகாப்பைக் கருத்தில் கொண்டு கூடுதல் பேருந்துகளை இயக்க வேண்டும் என சமூக ஆர்வலர்கள் கோரிக்கை விடுத்துள்ளனர்.

பாரதியார் பல்கலைக்கழக வளாகத்தில் சர்வசாதாரணமாக உலா வரும் காட்டுப்பன்றிகள்

Aarthi Govindaraman — Tue, 08 Sep 2026 14:14:31 +0530

கோவை மருதமலை வனப்பகுதியை ஒட்டியுள்ள பாரதியார் பல்கலைக்கழக வளாகத்திற்குள் காட்டுப்பன்றிகள் உள்ளிட்ட வனவிலங்குகள் அவ்வப்போது நுழைந்து வருகின்றன. கோடை மழை பொய்த்ததால் மேற்கு தொடர்ச்சி மலை வனப்பகுதியில் தண்ணீர் மற்றும் உணவு பற்றாக்குறை ஏற்பட்டுள்ளதாக கூறப்படுகிறது. இதனால் வனவிலங்குகள் உணவு, தண்ணீர் தேடி இரவு நேரங்களில் பல்கலைக்கழக வளாகத்திற்குள் உலா வருகின்றன. காட்டுப்பன்றிகள், முயல்கள், சாம்பார் மான்கள் மட்டுமின்றி யானைகள், சிறுத்தைகளும் இப்பகுதிக்கு வருவதாக கூறப்படுகிறது. இதையடுத்து, இரவு நேரங்களில் மாணவர்கள், பணியாளர்கள் மற்றும் காவலாளிகள் எச்சரிக்கையுடன் இருக்குமாறு வனத்துறையினர் அறிவுறுத்தியுள்ளனர். இந்நிலையில், இன்று மாலை சுமார் 7 மணியளவில் காட்டுப்பன்றி ஒன்று பல்கலைக்கழக வளாகத்திற்குள் நுழைந்து பிளாஸ்டிக் கழிவுகளைத் தேடி உண்ட காட்சிகள் வெளியாகி பரபரப்பை ஏற்படுத்தியுள்ளன.

மதுரை மீனாட்சி அம்மன் கோயில் கும்பாபிஷேகம்: ஏற்பாடுகள் தீவிரம்..

Aarthi Govindaraman — Tue, 08 Sep 2026 14:03:38 +0530

உலகப் புகழ்பெற்ற மதுரை மீனாட்சி சுந்தரேஸ்வரர் கோயில் கும்பாபிஷேகத்திற்கான பூர்வாங்க பூஜைகள் செப்டம்பர் 11-ம் தேதி வரை நடைபெறுகின்றன. காலை 7 மணிக்குப் பிறகு அம்மன் சன்னதி அருகே உள்ள சித்தி விநாயகர் சன்னதி முன்பு விநாயகர் பூஜையுடன் நிகழ்ச்சிகள் தொடங்குகின்றன. தொடர்ந்து கஜ பூஜை, கோ பூஜை, தன பூஜை நடைபெறுகிறது. செப்டம்பர் 9-ம் தேதி வைகை ஆற்றில் இருந்து புனித நீர் எடுத்து வரும் நிகழ்ச்சி நடைபெற உள்ளது. செப்டம்பர் 11-ம் தேதி முதல் வடக்கு ஆடி வீதியில் அமைக்கப்படும் பிரமாண்ட யாகசாலையில் 182 யாக குண்டங்களுடன் யாகசாலை பூஜைகள் தொடங்குகின்றன. செப்டம்பர் 11 முதல் 16 வரை பக்தர்களுக்கு மீனாட்சி அம்மன் மற்றும் சுந்தரேஸ்வரரை நேரடியாக தரிசிக்க அனுமதி இல்லை. செப்டம்பர் 16-ம் தேதி உப தெய்வங்களுக்கு கும்பாபிஷேகம் நடைபெறும். செப்டம்பர் 17-ம் தேதி காலை 7.40 முதல் 8.10 மணிக்குள் மகா கும்பாபிஷேகம் நடைபெற உள்ளது. தொடர்ந்து அக்டோபர் 2-ம் தேதி வரை மண்டல பூஜைகள் நடைபெறுகின்றன.

ஒரு முதல்வராக பொறுப்புடன் நடந்துக்கொள்ள வேண்டும்.. முதல்வர் விஜய்யின் பேச்சு மிகவும் கீழ்த்தரமானது – எம்.பி கனிமொழி காட்டம்..

Aarthi Govindaraman — Tue, 08 Sep 2026 07:41:15 +0530

செப்டம்படர் 8, 2026: முதலமைச்சர் காவல்துறை மானியக் கோரிக்கை மீதான விவாதத்தில் பேசும்போது, தமிழ்நாட்டில் நிலவும் சட்டம் - ஒழுங்கு பிரச்சினைகள் குறித்து பதிலளிப்பார் என எதிர்பார்த்ததாக திமுக நாடாளுமன்ற உறுப்பினர் கனிமொழி தெரிவித்துள்ளார். முதலமைச்சர் விஜய் பொறுப்பேற்ற பிறகு பெண்கள் மற்றும் குழந்தைகளுக்கு எதிரான குற்றங்கள், கொலை உள்ளிட்ட சம்பவங்கள் தொடர்ந்து நடைபெற்று வருவதாகவும், தமிழ்நாடு மோசமான சூழ்நிலையை நோக்கிச் செல்வதாகவும் அவர் குற்றம்சாட்டினார். இந்தப் பிரச்சினைகளை சரிசெய்ய அரசு என்ன நடவடிக்கைகளை மேற்கொண்டு வருகிறது என்பது குறித்து முதலமைச்சர் தெளிவான பதிலை மக்களுக்கு அளிப்பார் என எதிர்பார்த்த நிலையில், பழைய விவகாரங்கள் மற்றும் சில விசாரணை ஆணைய அறிக்கைகள் குறித்து பேசியதாக கனிமொழி விமர்சித்தார். மேலும், சட்டப்பேரவையில் முதலமைச்சர் விஜய் பேசிய விதம் மிகவும் கீழ்த்தரமானதாக இருந்ததாகவும், பதில் கேட்கும்போது அதற்கு பதிலளிக்க வேண்டும்; எதிர்க்கட்சிகள் கேள்வி எழுப்பினால் சட்டரீதியான நடவடிக்கை எடுக்கப்படும் என எச்சரிப்பது முறையல்ல என்றும் கனிமொழி தெரிவித்துள்ளார். முதலமைச்சர் பொறுப்புடன் நடந்து கொள்ள வேண்டும் என்றும் அவர் வலியுறுத்தினார்.

மாமதுரை திருவிழா 2.0.. பட்டாசு வெடிப்பதை காண கூடிய பொதுமக்கள்!

Vinalin Sweety — Mon, 07 Sep 2026 20:22:07 +0530

மதுரையில் மாமதுரை விழா 2.0 கோலாகலமாக நடைபெற்று வருகிறது. இந்த விழாவின் காரணமாக அங்கு வண்ண வண்ண நிறங்களில் வான வேடிக்கைகள் வெடிக்கப்பட்டது. அதனை அந்த பகுதியை சேர்ந்த சுற்று வட்டார பொதுமக்கள் வைகை ஆற்றின் கரையோரம் நின்று கண்டுகளித்தனர். குழந்தைகள் முதல் பெரியவர்கள் வரை என அனைத்து தரப்பினரும் மிகுந்த மகிழ்ச்சியுடன் இந்த வான வேடிக்கைகளை கண்டுகளித்தனர். முன்னதாக செப்டம்பர் 05, 2026 அன்று தமுக்கம் மைதானத்தில் பிரம்மாண்ட ட்ரோன் ஒளிக்காட்சி நடைபெற்றது. இதில், 50-க்கும் மேற்பட்ட ட்ரோன்கள் மூலம் மீன் சின்னம், மீனாட்சி கோபுரம் உள்ளிட்ட உருவங்களும் தோன்றின. இதனையும் அந்த சுற்றுவட்டார பகுதிகளை சேர்ந்த பொதுமக்கள் மிகுந்த ஆர்வத்துடன் கண்டுகளித்தனர்.

“சைக்கிளில் சென்றவரை துரத்திய தெருநாய்கள்” – கோவையில் அதிர்ச்சி சி.சி.டி.வி காட்சி!

Aarthi Govindaraman — Mon, 07 Sep 2026 19:52:59 +0530

கோவை: கோவை மாநகராட்சிப் பகுதிகளில் தெருநாய்களின் தொல்லை அதிகரித்து வரும் நிலையில், சைக்கிளில் சென்றவரை தெருநாய்கள் கூட்டமாகத் துரத்தும் சி.சி.டி.வி காட்சி வெளியாகி அதிர்ச்சியை ஏற்படுத்தியுள்ளது. சுந்தராபுரம், மதுக்கரை சாலை அஷ்டலட்சுமி நகர் பகுதியில் நேற்று மாலை சைக்கிளில் சென்ற நபரை, அங்கு கூட்டமாக நின்றிருந்த தெருநாய்கள் ஆக்ரோஷமாகக் குரைத்தபடி துரத்தியுள்ளன. நாய்களிடம் சிக்காமல் அவர் வேகமாக சைக்கிளை மிதித்துச் சென்ற காட்சிகள் கண்காணிப்பு கேமராவில் பதிவாகியுள்ளன.

இதே பகுதியில் 8 வயது சிறுமியையும் தெருநாய்கள் துரத்தியதாகக் கூறப்படுகிறது. அச்சமடைந்த சிறுமி இருசக்கர வாகனத்தில் வேகமாகத் தப்பிச் சென்ற நிலையில், அதிர்ஷ்டவசமாக விபத்து தவிர்க்கப்பட்டது. தெருநாய்களின் பெருக்கத்தைக் கட்டுப்படுத்தக் கோரி சமூக ஆர்வலர் நூர் அகமது மாவட்ட ஆட்சியரிடம் மனு அளித்துள்ளார். மாநகராட்சி உடனடியாக நடவடிக்கை எடுக்க வேண்டும் என பொதுமக்கள் வலியுறுத்தியுள்ளனர்.

காலில் இரும்புக் கம்பியுடன் தவித்த பெண் யானை.. ட்ரோன் மூலம் கண்காணித்து சிகிச்சை!

Aarthi Govindaraman — Mon, 07 Sep 2026 19:36:42 +0530

கோவை, செப். 7: கோவை அருகே சிறுமுகை வனப்பகுதியில் காலில் இரும்புக் கம்பி சிக்கி அவதிப்பட்ட பெண் யானைக்கு வனத்துறையினர் மற்றும் கால்நடை மருத்துவர்கள் சிகிச்சை அளித்து காப்பாற்றினர். சிறுமுகை அடுத்த பெத்திக்குட்டை, உளியூர் காப்புக்காடு பகுதியில் கடந்த 2-ஆம் தேதி ரோந்துப் பணியில் ஈடுபட்டிருந்த வனத்துறையினர், பெண் யானையின் இடது முன்னங்காலில் இரும்புக் கம்பி சிக்கியிருப்பதை கண்டறிந்தனர். இதையடுத்து மாவட்ட வன அலுவலர் தலைமையில் மீட்புக் குழு அமைக்கப்பட்டது. ஆனைமலை மற்றும் சத்தியமங்கலம் வனப்பகுதிகளைச் சேர்ந்த 5 கால்நடை மருத்துவர்கள், 60 வனப் பணியாளர்கள் மற்றும் யானைப் பாகன்கள் மீட்புப் பணியில் ஈடுபட்டனர். ட்ரோன் மூலம் யானையின் நடமாட்டத்தை கண்காணித்த வனத்துறையினர், நேற்று (செப். 6) மயக்க ஊசி செலுத்தி, காலில் சிக்கியிருந்த இரும்புக் கம்பியை அகற்றினர். காயத்துக்கு சிகிச்சை அளிக்கப்பட்டு, பின்னர் யானை மீண்டும் வனப்பகுதிக்குள் விடப்பட்டது.

மீனவராக நடித்தது பெரும் பாக்கியமாக நினைக்கிறேன்.. நடிகர் சூரி செய்தியாளர் சந்திப்பு!

Sekaran S — Mon, 07 Sep 2026 18:45:38 +0530

மண்டாட்டி திரைப்பட பிரமோஷனுக்கு வருகை புரிந்த நடிகர் சூரி, திரைப்படத்தின் கதாநாயகி மகிமா ஆகியோர் கோவை விமான நிலையத்தில் செய்தியாளர்களை சந்தித்தனர். திரைப்படம் மிகவும் அருமையாக வந்துள்ளது. ஒவ்வொரு ஊரிலும் படம் குறித்தான பிரமோஷன் நடைபெற்று வருகிறது. இரண்டு நாள் கோவையில் தான் இருப்போம். மீனவர்களுக்கான ஸ்பெஷல் ஷோ தற்பொழுது வரை எதுவும் முடிவு செய்யப்படவில்லை, அதனை தயாரிப்பாளர் தான் முடிவு செய்ய வேண்டும். இந்த திரைப்படம் மீனவர்களுக்கு மரியாதை செலுத்தும் விதமாக இருக்கும் என்று நம்புகிறேன். ராமநாதபுரம் சுற்றுவட்டார பகுதிகளில் பாய்மர படகு போட்டி பல வருடங்களாக நடைபெற்று வருகிறது. இந்த விளையாட்டை உலகம் முழுவதும் சேர்க்கின்ற படமாக இந்த படம் இருக்கும். இந்தப் போட்டி பலருக்கும் தெரியாது இதனை திரைப்படமாக பார்க்கும் பொழுது அனைவருக்கும் புதுவிதமான அனுபவமாக இருக்கும். மீனவர்கள் சார்ந்த பிரச்சனைகளும் படத்தில் உள்ளது அதனை படத்தில் பார்த்தால் அனைவருக்கும் தெரியும். அதனை முன்கூட்டியே கூறிவிட்டால் சஸ்பென்ஸ் போய்விடும் என்று அவர் கூறியுள்ளார். மீனவராக நடித்தது பெரும் பாக்கியமாக நினைக்கிறேன். இதை ஒரு அனுபவம் ஒரு வாழ்க்கை படமாக நான் கருதுகிறேன் என்றும் அவர் கூறியுள்ளார்.

கோவையில் துணிச்சலான கொள்ளை.. பூட்டிய வீட்டில் 5 நாட்கள் தங்கி சமைத்து சாப்பிட்ட கொள்ளையர்கள்!!

Sekaran S — Mon, 07 Sep 2026 07:55:12 +0530

கோவை, செப்டம்பர் 07: கோவை மாநகரில் பூட்டியிருந்த ஆடிட்டர் வீட்டின் கதவை உடைத்து ரூ.15 லட்சம் மதிப்பிலான வெள்ளி மற்றும் பித்தளைப் பொருட்களைக் கொள்ளையடித்த கும்பலை வெரைட்டி ஹால் காவல் துறையினர் 24 மணி நேரத்திற்குள் கைது செய்துள்ளனர். கொள்ளையடித்ததோடு மட்டுமன்றி, வீட்டின் உரிமையாளர்கள் இல்லாததைப் பயன்படுத்தி, அந்த வீட்டிலேயே சுமார் ஐந்து நாட்கள் தங்கி, சமையல் செய்து சாப்பிட்டுத் தூங்கிச் சென்ற கொள்ளையர்களின் துணிச்சலான செயல் காவல் துறையினரையே வியப்பில் ஆழ்த்தியுள்ளது. இச்சம்பவம் கோவை மக்களிடையே பெரும் பரபரப்பையும் அதிர்ச்சியையும் ஏற்படுத்தியுள்ளது.

கொள்ளை சம்பவம் நடந்த பின்னணி:

கோவை ஒப்பணக்கார வீதியைச் சேர்ந்த சேஷகிரி என்பவர் ஆடிட்டராகப் பணியாற்றி வருகிறார். இவருடைய மகன் பெங்களூரில் வசித்து வரும் நிலையில், மகனைப் பார்ப்பதற்காகச் சேஷகிரி கடந்த மாதம் தனது குடும்பத்தினருடன் வீட்டைப் பூட்டிவிட்டு பெங்களூரு சென்றிருந்தார். இதைப் பயன்படுத்திக்கொண்ட மர்ம நபர்கள் வீட்டின் கதவை உடைத்து உள்ளே புகுந்துள்ளனர். பெங்களூருவிலிருந்து கோவை திரும்பிய சேஷகிரி, வீட்டின் முன்பக்க கதவு பூட்டு உடைக்கப்பட்டுத் திறந்து கிடப்பதைக் கண்டு அதிர்ச்சியடைந்தார். உள்ளே சென்று பார்த்தபோது பொருட்கள் அனைத்தும் சிதறிக் கிடந்தன. பூஜை அறை மற்றும் சமையலறையில் இருந்த சுமார் 9 கிலோ வெள்ளித் தட்டுகள், வெள்ளி பூஜைப்பொருட்கள் மற்றும் 7 கிலோ பித்தளைப் பொருட்கள் என மொத்தம் ரூ.15 லட்சம் மதிப்பிலான பொருட்கள் கொள்ளையடிக்கப்பட்டிருந்தது தெரியவந்தது.

விநாயகர் சதூர்த்தி.. மயிலாடுதுறையில் சூழல் நட்பு வண்ண விநாயகர் சிலைகள் தயார்!!

Esakkiraja Selvarathinam — Sun, 06 Sep 2026 14:29:46 +0530

தமிழகம் முழுவதும் ஆண்டுதோறும் விநாயகர் சதுர்த்தி விழா மிகச் விமரிசையாகவும் ஆன்மீக எழுச்சியுடனும் கொண்டாடப்பட்டு வருகிறது. விநாயகர் சதுர்த்தியை முன்னிட்டு வீடுகளிலும், பொது இடங்களிலும் விதவிதமான விநாயகர் சிலைகளை நிறுவி வழிபாடு செய்வதும், பின்னர் அச்சிலைகளைக் நீர்நிலைகளில் கரைப்பதும் வழக்கமான மரபாக உள்ளது. இதற்காகத் தமிழகத்தின் பல்வேறு மாவட்டங்களில் சிலைகள் செய்யும் பணிகள் மாதக் கணக்கில் நடைபெறுவது வழக்கம். அந்த வகையில், மயிலாடுதுறை மாவட்டத்தில் விநாயகர் சதுர்த்தி பண்டிகையை முன்னிட்டு, சுற்றுச்சூழலுக்குப் பாதிப்பு ஏற்படுத்தாத வகையில் இயற்கைப் பொருட்களைக் கொண்டு வண்ணமயமான விநாயகர் சிலைகளைத் தயாரிக்கும் பணியில் கைவினைஞர்கள் முழு வீச்சில் ஈடுபட்டு வருகின்றனர்.

உருவாகும் வண்ணமயமான சிலைகள்:

மயிலாடுதுறை பகுதியில் தயாராகும் இந்த விநாயகர் சிலைகள் அனைத்தும் களிமண், மரத்தூள் மற்றும் கிழங்கு மாவு போன்ற எளிய, இயற்கையில் எளிதில் மக்கக்கூடிய பொருட்களைக் கொண்டு உருவாக்கப்படுகின்றன. நீர்நிலைகளின் மாசடைவதைத் தடுக்கும் பொருட்டு, இரசாயனப் பூச்சுகள் ஏதுமின்றி, நீரில் எளிதில் கரையக்கூடிய இயற்கை மற்றும் நீர்வண்ணக் கலவைகளே இச்சிலைகளுக்குப் பயன்படுத்தப்படுகின்றன. பல்வேறு கலைநயமிக்க வடிவங்களில், கம்பீரமான மற்றும் சாந்தமான தோற்றங்களில் உருவாக்கப்படும் இந்த அழகிய விநாயகர் சிலைகள் பார்ப்போரின் மனதைக் கவரும் வகையில் அமைந்துள்ளன.

தொடர் விடுமுறை.. தனுஷ்கோடியில் குவிந்த சுற்றுலா பயணிகள்.. 5 கி.மீ. தூரத்திற்கு ஸ்தம்பித்த போக்குவரத்து!!

Esakkiraja Selvarathinam — Sun, 06 Sep 2026 14:21:55 +0530

தமிழகத்தின் மிக முக்கிய சுற்றுலா மற்றும் ஆன்மீகத் தலங்களில் ஒன்றாக விளங்கும் ராமநாதபுரம் மாவட்டம் தனுஷ்கோடி மற்றும் அரிச்சல்முனை பகுதிகளுக்குத் தினந்தோறும் ஏராளமான உள்நாட்டு மற்றும் வெளிநாட்டுப் பயணிகள் வந்து செல்கின்றனர். குறிப்பாக வார இறுதி நாட்கள் மற்றும் தொடர் அரசு விடுமுறை நாட்களில் இங்கு வரும் சுற்றுலாப் பயணிகளின் எண்ணிக்கை பல மடங்கு அதிகரிப்பது வழக்கம். அந்த வகையில், தற்போதைய தொடர் விடுமுறையை முன்னிட்டு தமிழகத்தின் பல்வேறு மாவட்டங்களில் இருந்தும், பிற மாநிலங்களில் இருந்தும் ஆயிரக்கணக்கான வாகனங்களில் பயணிகள் ஒரே நேரத்தில் தனுஷ்கோடியை நோக்கிப் படையெடுத்தனர். இதனால் அரிச்சல்முனை செல்லும் கடல்வழிச் சாலையில் முன்னெப்போதும் இல்லாத வகையில் வாகன நெரிசல் ஏற்பட்டு அப்பகுதியே ஸ்தம்பித்தது.

5 கி.மீக்கும் அதிகமாக அணிவகுத்த வாகனங்கள்:

தனுஷ்கோடி முகுந்தராயர் சத்திரம் முதல் நாட்டின் கடைசி எல்லைப் பகுதியான அரிச்சல்முனை வரை உள்ள சாலைகளில் கார்கள், சுற்றுலா வேன்கள், இருசக்கர வாகனங்கள் மற்றும் அரசுப் பேருந்துகள் என ஆயிரக்கணக்கான வாகனங்கள் ஒரே நேரத்தில் அணிவகுத்து நின்றன. இதன் காரணமாகச் சுமார் 5 கிலோமீட்டருக்கும் அதிகமான தூரத்திற்குப் போக்குவரத்து கடுமையாகப் பாதிக்கப்பட்டு, வாகனங்கள் ஒன்றன்பின் ஒன்றாகச் ஊர்ந்து செல்லும் நிலை ஏற்பட்டது. மணி கணக்கில் போக்குவரத்து நெரிசலில் சிக்கித் தவித்ததால், குழந்தைகளுடனும் குடும்பத்துடனும் வந்த சுற்றுலாப் பயணிகள் கடும் அவதிக்கு உள்ளாகினர்.

கோவையில் துணிகரம்.. ஆந்திர நகை வியாபாரியிடம் ரூ.1 கோடி, வெள்ளி நகைகள் வழிப்பறி.. சிக்கிய 4 பேர்!!

Sekaran S — Sun, 06 Sep 2026 07:42:45 +0530

கோவை, செப்டம்பர் 06: தமிழகத்தின் தொழில் நகரங்களில் ஒன்றான கோவையின் முக்கிய மற்றும் எப்போதும் பிஸியாக காணப்படும் அவினாசி சாலையில், பட்டப்பகலில் நடந்த துணிகர வழிப்பறி சம்பவம் பெரும் அதிர்வலைகளை ஏற்படுத்தியுள்ளது. ஆந்திர மாநிலத்தைச் சேர்ந்த நகை வியாபாரி ஒருவரைக் குறிவைத்து, சுமார் ஒரு கோடி ரூபாய் ரொக்கப் பணம் மற்றும் விலைமதிப்பற்ற வெள்ளிப் பொருட்களைக் மர்மக் கும்பல் பறித்துச் சென்றுள்ளது. நகரின் மையப்பகுதியில், பொதுமக்கள் நடமாட்டம் அதிகமாக இருக்கும் வேளையில் அரங்கேறிய இந்தச் சம்பவம் குறித்து காவல் துறைக்கு உடனடியாகத் தகவல் தெரிவிக்கப்பட்டு, தீவிரத் தேடுதல் வேட்டை முடுக்கிவிடப்பட்டது.

சம்பவம் நடந்த விதம்:

ஆந்திர மாநிலம் நெல்லூர் பகுதியைச் சேர்ந்த ரங்கசாமி என்பவர், அங்குள்ள தனது உறவினரின் நகைக்கடையில் பணிபுரிந்து வருகிறார். இவர் தொழில்முறை காரணமாகக் கோவைக்கு வந்து, இங்குள்ள தங்க நகை உற்பத்தியாளர்களிடம் இருந்து நகைகளை வாங்கிச் செல்வதை வழக்கமாகக் கொண்டுள்ளார். அந்த வகையில், நகைகள் வாங்குவதற்காக ஆந்திராவிலிருந்து ஆம்னி பேருந்து மூலம் இன்று கோவை வந்தடைந்த ரங்கசாமி, அவினாசி சாலையில் அமைந்துள்ள லட்சுமி மில் சந்திப்பு பேருந்து நிறுத்தத்தில் இறங்கியுள்ளார். பின்னர், வழக்கமாகத் தான் நகை வாங்கும் கடைக்காரருக்குத் தொலைபேசியில் தொடர்பு கொண்டுத் தான் வந்துவிட்ட தகவலைத் தெரிவித்துவிட்டு, தன்னை அழைத்துச் செல்ல ஆட்கள் வரும்வரை அங்கு காத்திருந்துள்ளார்.

கோவையில் நூதன திருட்டு: சிசிடிவியில் சிக்கிய டிப்டாப் ஆசாமி!

Aarthi Govindaraman — Sat, 05 Sep 2026 11:56:10 +0530

கோவை காந்திபுரம் அடுத்த 100 அடி சாலையில், கடைக்கு சென்ற நபரின் வாகனத்தில் இருந்த செல்போன் மற்றும் முக்கிய ஆவணங்களை மர்மநபர் திருடிச் சென்ற சம்பவம் பரபரப்பை ஏற்படுத்தியுள்ளது. கோவையில் குற்றச் சம்பவங்களைத் தடுக்க மாநகர காவல்துறையினர் பல்வேறு நடவடிக்கைகளை மேற்கொண்டு வருகின்றனர். இதன் ஒரு பகுதியாக மாநகர் மற்றும் புறநகர் பகுதிகளில் சிசிடிவி கேமராக்கள் பொருத்தப்பட்டு கண்காணிப்பு தீவிரப்படுத்தப்பட்டுள்ளது. இந்நிலையில், 100 அடி சாலையில் ஒருவர் தனது வாகனத்தை நிறுத்திவிட்டு அருகிலுள்ள கடைக்குச் சென்றுள்ளார். இதனை நோட்டமிட்ட டிப்டாப் ஆசாமி, வாகனத்தை திறந்து அதில் இருந்த செல்போன்கள் மற்றும் முக்கிய ஆவணங்களை திருடிச் சென்றுள்ளார். இந்த காட்சிகள் சிசிடிவியில் பதிவாகியுள்ளன. அதன் அடிப்படையில் காவல்துறையினர் வழக்குப்பதிவு செய்து மர்மநபரை தேடி வருகின்றனர்.

கேரளாவில் கோர விபத்து: 8 தமிழ்நாட்டு பொறியியல் மாணவர்கள் உயிரிழப்பு!

Aarthi Govindaraman — Sat, 05 Sep 2026 08:11:12 +0530

கேரள மாநிலம் திருச்சூர் மாவட்டம் பனம்பிக்கும் பகுதியில் தேசிய நெடுஞ்சாலை 66-ல் நிறுத்தி வைக்கப்பட்டிருந்த லாரி மீது கார் மோதி விபத்துக்குள்ளானதில், தமிழ்நாட்டைச் சேர்ந்த 8 பொறியியல் மாணவர்கள் பரிதாபமாக உயிரிழந்தனர். வெள்ளிக்கிழமை நள்ளிரவு 12 மணியளவில் குருவாயூரில் இருந்து கொடுங்கல்லூர் நோக்கிச் சென்ற கார், சாலை கட்டுமானப் பணிகள் நடைபெறும் பகுதியில் நிறுத்தப்பட்டிருந்த மகாராஷ்டிரா பதிவு எண் கொண்ட லாரி மீது மோதியது. கார் முழுவதும் நொறுங்கியதால், தீயணைப்புத் துறையினர் வாகனத்தை வெட்டி உடல்களை மீட்டனர். உயிரிழந்தவர்கள் அனைவரும் சுமார் 20 வயதுடையவர்கள் என்றும், திண்டுக்கல் பி.எஸ்.என்.ஏ பொறியியல் கல்லூரி மாணவர்கள் என்றும் தெரியவந்துள்ளது. விஷ்வா, சூர்யா, யுவ சஞ்சித், சந்தோஷ், பிரசன்னா உள்ளிட்ட 5 பேர் அடையாளம் காணப்பட்டுள்ளனர். மற்றவர்களை அடையாளம் காணும் பணிகள் நடைபெற்று வருகின்றன. உடல்கள் திருச்சூர் மருத்துவக் கல்லூரிக்கு அனுப்பப்பட்டுள்ளன.

காரமடை அருகே குட்டையில் நீண்ட நேரம் குளித்து மகிழ்ந்த காட்டு யானைகள் – வைரல் வீடியோ!

Aarthi Govindaraman — Fri, 04 Sep 2026 13:32:40 +0530

காரமடை அருகே வெள்ளியங்காடு பகுதியில் வெயிலின் தாக்கத்தைத் தணிக்க இரண்டு காட்டு யானைகள் குட்டையில் நீண்ட நேரம் குளித்த காட்சி சமூக வலைதளங்களில் வைரலாகி வருகிறது. வனப்பகுதிகளில் கடும் வறட்சி நிலவி வருவதால், காட்டு யானைகள் உள்ளிட்ட வனவிலங்குகள் உணவு மற்றும் தண்ணீரை தேடி மக்கள் வசிக்கும் பகுதிகளுக்கு வருவது அதிகரித்துள்ளது. இந்நிலையில், காரமடை வனச்சரகத்தில் இருந்து வெளியேறிய இரண்டு யானைகள் வெள்ளியங்காடு பகுதியில் உள்ள குட்டையில் நீண்ட நேரம் குளித்தன. பின்னர் அங்கிருந்து நகர்ந்த யானைகள் அருகிலுள்ள விளைநிலங்களுக்குள் புகுந்து பயிர்களை சேதப்படுத்திவிட்டு மீண்டும் வனப்பகுதிக்குள் சென்றன. யானைகள் குட்டையில் குளித்ததை விவசாயி ஒருவர் செல்போனில் பதிவு செய்து சமூக வலைதளங்களில் வெளியிட்டுள்ளார். இதனால் பொதுமக்கள் அச்சமடைந்துள்ள நிலையில், வனத்துறை உரிய நடவடிக்கை எடுக்க வேண்டும் என கோரிக்கை விடுத்துள்ளனர்.

கோவை இஸ்கான் கோவிலில் கோலாகலமாக கொண்டாடப்பட்ட கிருஷ்ண ஜென்மாஷ்டமி!

Aarthi Govindaraman — Fri, 04 Sep 2026 11:36:15 +0530

கிருஷ்ணர் பிறந்த தினமான இன்று, நாடு முழுவதும் கிருஷ்ண ஜெயந்தி மற்றும் கிருஷ்ண ஜென்மாஷ்டமி விழா சிறப்பாக கொண்டாடப்பட்டு வருகிறது. அதன் ஒரு பகுதியாக, கோவை கொடிசியா அருகே உள்ள இஸ்கான் ஜெகன்நாதர் ஆலயத்தில் ஸ்ரீ கிருஷ்ண ஜென்மாஷ்டமி விழா கோலாகலமாக நடைபெற்றது. அதிகாலை முதலே சிறப்பு ஆராதனை, அகண்ட நாம சங்கீர்த்தனம் உள்ளிட்ட நிகழ்ச்சிகள் நடைபெற்றன. பக்தர்கள் கிருஷ்ண நாமங்களைப் பாடியபடி சுவாமி தரிசனம் செய்தனர். பலராமர், சுபத்ரா மற்றும் கிருஷ்ணர் சிறப்பு அலங்காரத்தில் பக்தர்களுக்கு அருள்பாலித்தனர். மேலும், பக்தர்கள் “ஹரே ராமா, ஹரே கிருஷ்ணா” என்ற பக்தி முழக்கங்களுடன் கோவிலை வலம் வந்து சுவாமி தரிசனம் செய்தனர். பலர் தங்களது குழந்தைகளுக்கு கிருஷ்ணர் மற்றும் ராதை வேடமிட்டு அழைத்து வந்து வழிபட்டனர். இதனைத் தொடர்ந்து இன்று மாலை கலச அபிஷேகம் மற்றும் பல்வேறு கலை நிகழ்ச்சிகள் நடைபெற உள்ளன. கோவிலுக்கு வரும் பக்தர்கள் அனைவருக்கும் பிரசாதம் வழங்கப்படுகிறது.

நாய்கள் செய்த அதிசயம்.. நள்ளிரவில் பெண்ணுக்கு நடந்த கொடூரம்.. கைது செய்யப்பட்ட போதை இளைஞர்..

Aarthi Govindaraman — Fri, 04 Sep 2026 07:52:53 +0530

செப்டம்பர் 4, 2026: கோவை துடியலூர் அருகே நள்ளிரவில் மனநலம் பாதிக்கப்பட்ட பெண்ணை மானபங்கம் செய்ய முயன்ற போதை இளைஞரை, அங்கிருந்த 2 வளர்ப்பு நாய்கள் விரட்டிக் கடித்து பெண்ணைக் காப்பாற்றிய சம்பவம் பரபரப்பை ஏற்படுத்தியுள்ளது. என்.ஜி.ஜி.ஓ. காலனி அசோகபுரத்தில் பெட்டிக்கடை தீ வைப்பு குறித்து போலீசார் சிசிடிவி காட்சிகளை ஆய்வு செய்தபோது, இந்த அதிர்ச்சி சம்பவம் பதிவாகியிருந்தது தெரியவந்தது.

அதிகாலை 2 மணியளவில் சாலையோரம் தனியாக இருந்த பெண்ணிடம் கஞ்சா மற்றும் மது போதையில் வந்த இளைஞர் ஒருவர், திடீரென அத்துமீற முயன்றுள்ளார். பெண் கூச்சலிட்டதும், 2 நாய்கள் பாய்ந்து சென்று இளைஞரைக் கடித்து விரட்டியுள்ளன. சிசிடிவி அடிப்படையில் கணேஷ் நகர் பகுதியைச் சேர்ந்த பூபதியை துடியலூர் போலீசார் கைது செய்து விசாரணை நடத்தி வருகின்றனர்.

ஜல்லிக்கட்டு குறித்து தவெக எம்.எல்.ஏ சர்ச்சை பேச்சு.. அதிமுக தரப்பில் அலங்காநல்லூரில் போராட்டம்..

Aarthi Govindaraman — Thu, 03 Sep 2026 13:14:39 +0530

செப்டம்பர் 3, 2026: ஜல்லிக்கட்டு குறித்து சோழவந்தான் தமிழக வெற்றிக்கழக எம்எல்ஏ கருப்பையா பேசியதைக் கண்டித்து, அலங்காநல்லூரில் அதிமுகவினர் கண்டன ஆர்ப்பாட்டத்தில் ஈடுபட்டனர். இளைஞர்களின் ஜல்லிக்கட்டு விளையாட்டை சீரழிக்கும் வகையில் எம்எல்ஏ கருப்பையா கொச்சைப்படுத்திப் பேசியதாக அதிமுகவினர் குற்றம்சாட்டினர். இந்தப் போராட்டத்தில் அதிமுக முன்னாள் அமைச்சர்கள் ஆர்.பி. உதயகுமார், செல்லூர் ராஜூ உள்ளிட்டோர் பங்கேற்றனர்.

அலங்காநல்லூர் ஜல்லிக்கட்டு நடைபெறும் பாடிவாசல் பகுதியில் நடைபெற்ற ஆர்ப்பாட்டத்தில், எம்எல்ஏ கருப்பையாவைக் கண்டித்து கோஷங்கள் எழுப்பப்பட்டன. மேலும், அவரது பேச்சுக்கு தமிழக வெற்றிக்கழக அரசு கண்டனம் தெரிவிக்காதது குறித்தும் கேள்வி எழுப்பப்பட்டது. கடந்த 2017-ம் ஆண்டு ஜல்லிக்கட்டுக்கு தடை விதிக்கப்பட்டபோது, அப்போதைய அதிமுக ஆட்சியில் முதலமைச்சராக இருந்த ஓ.பன்னீர்செல்வம், ஜல்லிக்கட்டை மீண்டும் நடத்த நடவடிக்கைகள் மேற்கொண்டார். அதேபோல், ஜல்லிக்கட்டு தடையை எதிர்த்து சென்னை மெரினாவில் மிகப்பெரிய போராட்டம் நடைபெற்றது குறிப்பிடத்தக்கது.

பலரின் பொறுப்புகள் பறிக்கப்படும் – புதிய நிர்வாகிகளுக்கு மு.க ஸ்டாலின் அட்வைஸ்

Aarthi Govindaraman — Thu, 03 Sep 2026 07:48:32 +0530

திமுக 2.0-க்கான பயணத்தை தொடங்கியுள்ளதாகக் கூறிய திமுக தலைவரும், முதலமைச்சருமான மு.க.ஸ்டாலின், தேர்தல் பின்னடைவுக்கான காரணங்களை ஆராய்ந்து கட்சிக் கட்டமைப்பை வலுப்படுத்த நடவடிக்கைகள் மேற்கொள்ளப்பட்டு வருவதாக தெரிவித்தார். கட்சியில் 110 மாவட்டங்கள் உருவாக்கப்பட்டுள்ள நிலையில், மறுசீரமைப்புப் பணிகளுக்காக தலைமைக்கழக பிரதிநிதிகள் நியமிக்கப்பட்டுள்ளதாகவும், அவர்கள் பாகுபாடின்றி பணியாற்ற வேண்டும் என்றும் அவர் அறிவுறுத்தினார். கிளை முதல் தலைமைக்கழகம் வரையிலான பதவிகளுக்கு சுதந்திரமாகவும் நேர்மையாகவும் தேர்தல் நடத்த வேண்டும் எனவும் வலியுறுத்தினார். வயது வரம்பு உள்ளிட்ட காரணங்களால் சில நிர்வாகிகளின் பதவிகள் மாற்றப்படலாம் என்றும், அவர்களின் தகுதிக்கேற்ப வேறு பொறுப்புகள் வழங்கப்படும் என்றும் கூறினார். “மின்மினிப் பூச்சிகள் நிரந்தரம் கிடையாது; சூரியன்தான் நிரந்தரம். கழகத்தை மறுசீரமைப்போம்; நீண்டு வருவோம்; மீண்டும் வெல்வோம்” என மு.க.ஸ்டாலின் தெரிவித்தார்.

தடியால் அடித்தும் விடாமல் பெண்ணை கடித்த பிட் புல் நாய் – அதிர்ச்சி வீடியோ வைரல்!

Aarthi Govindaraman — Wed, 02 Sep 2026 22:56:55 +0530

நாமக்கல் மாவட்டம் ராசிபுரத்தில் வீட்டில் வளர்க்கப்பட்ட 9 மாத வயதுடைய பிட் புல் நாய், பெண்ணை சரமாரியாக கடித்துக் குதறிய சம்பவம் அதிர்ச்சியை ஏற்படுத்தியுள்ளது. புதுப்பாளையம் சாலையில் உள்ள சுப்பிரமணிய நகரில் வசிக்கும் கணேசனின் மனைவி கவிதா, 44, வீட்டில் இருந்தபோது நாய் திடீரென தாக்கியுள்ளது. முகம், தலை, கை, கால் உள்ளிட்ட பல்வேறு பகுதிகளில் கடிபட்டதில் அவர் படுகாயமடைந்தார். தற்போது வெளியாகியுள்ள வீடியோவில், கீழே விழுந்த கவிதாவை நாய் தொடர்ந்து தாக்குவதும், அக்கம் பக்கத்தினர் தடியால் அடித்து விரட்ட முயன்றும் தாக்குதலை நிறுத்தாமல் மீண்டும் கடிப்பதும் பதிவாகியுள்ளது. படுகாயமடைந்த கவிதா ராசிபுரம் அரசு மருத்துவமனையில் முதலுதவி சிகிச்சைக்குப் பின்னர், சேலம் அரசு மருத்துவமனைக்கு அனுப்பி வைக்கப்பட்டார். இதுகுறித்து ராசிபுரம் போலீசார் விசாரணை நடத்தி வருகின்றனர்.

கோவையில் பழங்கால கேமராக்கள் கண்காட்சி; ஆர்வமுடன் வந்த மாணவர்கள்

Aarthi Govindaraman — Wed, 02 Sep 2026 22:27:12 +0530

உலக புகைப்பட தினத்தை முன்னிட்டு, கோவைப்புதூரில் உள்ள விஎல்பி கல்லூரியில் “லுமினா 2.0” என்ற பெயரில் பழங்கால கேமராக்கள் மற்றும் புகைப்படக் கண்காட்சி நடைபெற்றது. இரண்டு நாட்கள் நடைபெறும் இக்கண்காட்சியில், புகைப்படக் கலையின் ஆரம்ப காலத்தை நினைவுபடுத்தும் பல்வேறு பழங்கால கேமராக்கள் காட்சிப்படுத்தப்பட்டுள்ளன. மேலும், சிறப்பு புகைப்படக் கண்காட்சி, டென்ட்கொட்டா திரை அனுபவம், முப்பரிமாணக் காட்சிகள் உள்ளிட்ட அரங்குகளும் அமைக்கப்பட்டுள்ளன. பழங்கால கேமராக்களின் வடிவமைப்பு, செயல்பாடு மற்றும் தொழில்நுட்பம் குறித்து பார்வையாளர்களுக்கு விளக்கமளிக்கப்பட்டது. அக்கால கேமராக்களையும் நவீன புகைப்படக் கருவிகளையும் ஒப்பிட்டுப் பார்க்கும் வகையிலும் ஏற்பாடுகள் செய்யப்பட்டிருந்தன. கோவை மற்றும் சுற்றுவட்டார அரசு, தனியார் பள்ளி மாணவர்கள் ஏராளமானோர் கண்காட்சியை ஆர்வத்துடன் பார்வையிட்டு, பழங்கால கேமராக்கள் குறித்து வியப்புடன் கேட்டறிந்தனர்.

கோவை ரயில் நிலைய பேருந்து நிறுத்தத்தில் கள்ளச்சந்தையில் மது விற்பனை? – வைரல் வீடியோ !

Aarthi Govindaraman — Wed, 02 Sep 2026 22:03:38 +0530

கோவை ரயில் நிலைய பேருந்து நிறுத்தத்தில் கள்ளச்சந்தையில் மதுபானங்கள் விற்பனை செய்யப்படுவதாக கூறப்படும் வீடியோ சமூக வலைதளங்களில் வைரலாகி பரபரப்பை ஏற்படுத்தியுள்ளது. கோவை ரயில் நிலையம், மாவட்ட ஆட்சியர் அலுவலகம், அரசு மருத்துவக் கல்லூரி மருத்துவமனை, மாநகர காவல் ஆணையர் மற்றும் மாவட்ட காவல் கண்காணிப்பாளர் அலுவலகங்கள் உள்ளிட்ட முக்கிய அரசு அலுவலகங்கள் அருகருகே அமைந்துள்ளன. இதனால் சுற்றுவட்டாரத்தில் சுமார் 3 கிலோமீட்டர் தொலைவுக்கு டாஸ்மாக் கடைகள் செயல்பட அனுமதி இல்லை என கூறப்படுகிறது. இந்நிலையில், பேருந்து நிறுத்தத்தில் பயணி போல் அமர்ந்திருந்த ஒருவர், கைப்பையில் மதுபாட்டில்களை வைத்து அதிக விலைக்கு விற்பனை செய்ததாக கூறப்படுகிறது. இதனை சமூக ஆர்வலர் ஒருவர் செல்போனில் பதிவு செய்த நிலையில், வீடியோ தற்போது வைரலாகி வருகிறது.

தூத்துக்குடியில் பறவைகள் சீசன் தொடக்கம்.. பெருங்குளத்திற்கு முன்கூட்டியே வருகை தந்த வலசைப் பறவைகள்!

Esakkiraja Selvarathinam — Wed, 02 Sep 2026 08:54:28 +0530

தூத்துக்குடி, செப்.02: தமிழ்நாட்டின் தென் மாவட்டங்களில் ஒன்றான தூத்துக்குடியில் உள்ள இயற்கை எழில் கொஞ்சும் பெருங்குளம் ஈரநிலப் பகுதி, சர்வதேச அளவில் பறவைகள் தங்கிச் செல்லும் மிக முக்கியமான மையமாகத் திகழ்கிறது. ஒவ்வொரு ஆண்டும் குளிர்காலத்தை முன்னிட்டு உலகின் பல்வேறு தொலைதூர நாடுகளிலிருந்தும் ஆயிரக்கணக்கான நீர்வாழ் வலசைப் பறவைகள் இங்கு வருவது வழக்கம். அந்த வகையில், இந்த ஆண்டு வழக்கமான சீசன் தொடங்குவதற்கு முன்னதாகவே பெருங்குளம் நீர்நிலைகளுக்கு வெளிநாட்டுப் பறவைகள் திரளாக வருகை தரத் தொடங்கியிருப்பது இயற்கை ஆர்வலர்கள் மற்றும் பறவை பிரியர்களிடையே பெரும் மகிழ்ச்சியையும் உற்சாகத்தையும் ஏற்படுத்தியுள்ளது.

குவியும் வெளிநாட்டு விருந்தினர்கள்:

வட ஐரோப்பா, சைபீரியா, மத்திய ஆசியா மற்றும் ஆர்க்டிக் பகுதிகள் உள்ளிட்ட கடும் பனிப்பொழிவு நிலவும் இடங்களிலிருந்து ஆயிரக்கணக்கான மைல்கள் வான்வழியாகப் பயணித்து பல்வேறு வகையான நீர்ப்பறவைகள் தூத்துக்குடி பெருங்குளம் பகுதியை வந்தடைந்துள்ளன. இங்கு நிலவும் சாதகமான தட்பவெப்ப நிலை, பறவைகளுக்குத் தேவையான போதிய உணவு ஆதாரம் மற்றும் பாதுகாப்பான சூழல் காரணமாகவே இவை ஆண்டுதோறும் இங்கு வருகின்றன. தற்போது வந்துள்ள பறவைகளின் எண்ணிக்கையும், அவற்றின் பல்வேறு இனங்களின் வருகையும் இப்பகுதியின் இயற்கை சமநிலையைக் காட்டுவதாக அமைந்துள்ளதாகக் கள பார்வையாளர்கள் தெரிவிக்கின்றனர்.

இந்திய அணிக்கு களமிறங்கி ரன்களைக் குவிப்பதே முக்கியம்.. ருதுராஜ் கெய்க்வாட் உறுதி!

Mukesh Kannan — Tue, 01 Sep 2026 23:15:26 +0530

கோயம்புத்தூரில் இந்திய கிரிக்கெட் அணிக்குத் திரும்புவது குறித்துப் பேசிய கிரிக்கெட் வீரரும் சென்னை சூப்பர் கிங்ஸ் அணியின் கேப்டனுமான ருதுராஜ் கெய்க்வாட், "நான் மிகுந்த நம்பிக்கையுடன் இருக்கிறேன். மீண்டும் களமிறங்கி ரன்களைக் குவிப்பதே முக்கியம்; கடந்த சில ஆண்டுகளாகவே நான் தொடர்ந்து ரன்களை எடுத்து வருகிறேன், எனவே சீரான ஆட்டத்தை வெளிப்படுத்தி, எனக்கான வாய்ப்புக்காகக் காத்திருப்பதே இப்போதுள்ள விஷயம்..." என்று கூறினார்.

மூதாட்டியின் வீட்டுக்கு முதல்வர் விஜய் சர்ப்ரைஸ் விசிட் – கூலிங் கிளாஸ் அணிவித்து மகிழ்ச்சி

Sathis S — Tue, 01 Sep 2026 15:35:18 +0530

மேட்டூர் அணையில் இருந்து நீர் திறந்து வைப்பதற்காக சேலம் வந்த முதல்வர் விஜய் விவசாயம் பார்த்து வரும் பாட்டியின் வீட்டு சர்ப்ரைஸ் விசிட் அடித்தார்.தனது வீட்டுக்கு வந்த முதல்வர் விஜய்யை கையை பிடித்து மூதாட்டி அழைத்துச் சென்று வரவேற்றார். அவரிடம் விவசாயப் பணிகள் குறித்து கேட்டறிந்த முதல்வர், மாநாட்டுக்கு தனது கூலிங் கிளாஸை பரிசளித்தார். இந்த 2026 ஆம் ஆண்டு ஜூன் மாதத்தில் மேட்டூர் அணை திறக்கப்படாததால் டெல்டா விவசாயிகள் கடுமையாக பாதிக்கப்பட்டனர். விவசாயப் பணிகளை மேற்கொள்ள போதிய நீர் ஆதாரம் இல்லாததால், மேட்டூர் அணையில் இருந்து தண்ணீர் திறக்க வேண்டும் என விவசாயிகள் தொடர்ந்து கோரிக்கை விடுத்து வந்தனர். இந்நிலையில், விவசாயிகளின் கோரிக்கையை ஏற்று இன்று மேட்டூர் அணையில் இருந்து முதலமைச்சர் விஜய் தண்ணீர் திறந்து வைக்கிறார். முதலமைச்சராக பொறுப்பேற்ற பிறகு விஜய் முதன்முறையாக மேட்டூர் அணையில் இருந்து டெல்டா பாசனத்திற்காக தண்ணீர் திறந்து வைப்பது குறிப்பிடத்தக்கது.