கோவையில் மறுமலர்ச்சி மக்கள் இயக்கம் சார்பில் நடைபெற்ற ஆர்ப்பாட்டத்தில், தனியார் கல்லூரிகளின் கட்டண முறைகேடுகளை கட்டுப்படுத்த தமிழக அரசு நடவடிக்கை எடுக்க வேண்டும் என வலியுறுத்தப்பட்டது. உயர்கல்வி குறித்த வெள்ளை அறிக்கையை வெளியிடவும், அனைத்து கல்லூரி சேர்க்கைகளையும் ஒற்றைச் சாளர முறையில் நடத்தவும் கோரிக்கை விடுக்கப்பட்டது. ஏழை மாணவர்களின் கல்வி உரிமையை பாதுகாக்க தொடர்ந்து போராடுவோம் என இயக்கத் தலைவர் ஈஸ்வரன் தெரிவித்தார்.

கும்பகோணம் பாலக்கரை பகுதியில் காவிரி ஆற்றில் தேங்கி கிடக்கும் குறைந்த நீரில் முதலை இருப்பதாக சமூக வலைதளங்களில் வீடியோ ஒன்று வைரலாக பரவி வருகிறது. டெல்டா பகுதி விவசாயிகளின் முக்கிய நீர் ஆதாரமான காவிரி, தற்போது மேட்டூர் அணையிலிருந்து தண்ணீர் திறக்கப்படாததால் வறண்டு காணப்படுகிறது. இந்நிலையில் வெளியான இந்த வீடியோ, காவிரி கரையோர மக்களிடையே பெரும் அச்சத்தை ஏற்படுத்தியுள்ளது. குறிப்பாக, ஆற்றில் தர்ப்பணம் மற்றும் பிற சடங்குகள் செய்ய வரும் பக்தர்களும் பீதியடைந்துள்ளனர். இந்த வீடியோவின் உண்மைத்தன்மை குறித்து அதிகாரிகள் விசாரணை நடத்த வேண்டும் என பொதுமக்கள் கோரிக்கை விடுத்துள்ளனர்.

கிருஷ்ணகிரி மாவட்டத்தில் மாம்பழங்களுக்கு போதிய விலை கிடைக்காததால் விவசாயிகள் கடும் பாதிப்புக்கு உள்ளாகியுள்ளனர். மாங்காய் கிலோவுக்கு ரூ.12 நிர்ணயிக்கப்பட்டிருந்தாலும், வியாபாரிகள் ரூ.3 மட்டுமே வழங்குவதாக குற்றச்சாட்டு எழுந்துள்ளது. இதனால் பறிப்புக் கூலி மற்றும் போக்குவரத்துச் செலவுகூட கிடைக்காத நிலையில், விவசாயிகள் டன் கணக்கிலான மாங்காய்களை சாலை ஓரங்களில் கொட்டிவிட்டு செல்கின்றனர். சாலைகளில் மாங்காய்கள் அழுகி தேங்கி வருகின்றன. ஆண்டு முழுவதும் உழைத்தும் நஷ்டம் மட்டுமே ஏற்படுவதாக விவசாயிகள் வேதனை தெரிவிக்கின்றனர். இதே நிலை தொடர்ந்தால் மா சாகுபடியை கைவிட்டு மாற்றுப் பயிர்களுக்கு மாற வேண்டிய சூழல் உருவாகும் என அவர்கள் எச்சரித்துள்ளனர்.

மேட்டுப்பாளையம் வனப்பகுதியில் நிலவும் கடும் வறட்சியால், உணவு மற்றும் தண்ணீர் தேடி புள்ளிமான் ஒன்று ஊருக்குள் புகுந்தது. தெருநாய்கள் துரத்தியதால் அச்சமடைந்த மான், மேட்டுப்பாளையம்-கோவை சாலையில் உள்ள முன்னாள் நீதிமன்ற வளாக கட்டிடத்தில் தஞ்சமடைந்தது. தகவலறிந்து வந்த வனத்துறையினர் அதை வலை மூலம் பிடிக்க முயன்றனர். ஆனால் வலையில் சிக்காமல் தப்பித்த மான், அருகிலிருந்த கட்டிடத்தின் மீது தாவி, பின்னர் வாகனப் போக்குவரத்துக்கு இடையே சென்று மீண்டும் வனப்பகுதிக்குள் நுழைந்தது. இந்த சம்பவத்தால் அப்பகுதியில் சிறிது நேரம் பரபரப்பு ஏற்பட்டது.